Беларусь плануе павялічыць экспарт прадуктаў харчавання і сельгассыравіны да $12 млрд да 2030 года. Аб гэтым ішла размова на Беларуска-пакістанскім бізнес-форуме, які прайшоў пад старшынствам намесніка міністра сельскай гаспадаркі і харчавання Беларусі Аляксандра Якоўчыца і прэзідэнта Гандлёва-прамысловай палаты Ісламабада Сардара Тахіра Мехмуда, паведамілі БелТА ў прэс-службе Міністэрства сельскай гаспадаркі і харчавання.
Да 2030 года Беларусь плануе выйсці на вытворчасць 10,5 млн т малака і больш як 2 млн т мяса, а экспарт прадуктаў харчавання і сельгассыравіны павялічыць да $12 млрд. Сёння беларуская прадукцыя харчавання пастаўляецца больш як у 100 краін свету.
«У нашай прадуктовай карзіне пакістанскі спажывец знойдзе для сябе элітныя сыры, кансервы з мяса ялавічыны з тэрмінам прыдатнасці да чатырох гадоў, малочныя кансервы, у тым ліку вядомую з часоў Савецкага Саюза згушчонку», — адзначыў Аляксандр Якоўчыц.
Дыялог паміж прадстаўнікамі бізнес-супольнасцей дзвюх краін стане стартавай пляцоўкай на шляху да заключэння канкрэтных камерцыйных кантрактаў і пагадненняў.
