Наш спартсмен падняўся на подыум у вазе звыш 87 кг. На старце турніру Плоніс перамог партугальца Ціягу Рыбейра, у чвэрцьфінале адолеў ізраільцяніна Ілью Рудэрмана, але ў паўфінале ўступіў першаму сеянаму Кейдэну Канінгему з Вялікабрытаніі. Паядынкі за трэцяе месца на турніры не праводзяцца, такім чынам Арцём стаў уладальнікам бронзы.

Тры гады таму Плоніс заваяваў бронзавы медаль на чэмпіянаце свету. Усяго на кантынентальным форуме ў Мюнхене беларускую каманду прадстаўляюць 12 спартсменаў, спаборніцтвы завершацца 14 мая. На мінулагоднім першынстве Еўропы нашы тхэквандысты заваявалі чатыры медалі (1-1-2).