35-гадовы мужчына з Мінска за 1,5 года не выйшаў на працу 392 разы. Ён працаваў прыбіральшчыкам на транспартным прадпрыемстве і рэгулярна прагульваў з-за алкагольнай залежнасці. Паведаміла «Мінская праўда».
Што вядома пра заўзятага прагульшчыка
У мужчыны ёсць дзве дачкі 8 і 11 гадоў, якія знаходзяцца на дзяржзабеспячэнні. Грошы на іх утрыманне амаль не паступалі, бо адлічэнні рабіліся з мізэрнага заробку.
Чаму папярэджанні не спрацавалі
Супрацоўнікі аддзела прымусовага выканання неаднаразова папярэджвалі мужчыну, але ён працягваў прагулы. У выніку справа дайшла да суда.
Мінчаніну прызначылі абмежаванне волі на 2 гады 6 месяцаў без накіравання ў папраўчую ўстанову і прымусовае лячэнне ад алкагалізму.
Раней ён ужо чатыры разы быў судзімы за аналагічныя парушэнні.
