Прадстаўленая канцэпцыя НАТА прадугледжвае ў тым ліку нанясенне прэвентыўных удараў па тэрыторыі Беларусі з прымяненнем дронаў і наземных рабатызаваных сістэм, звярнуў увагу прэс-сакратар МЗС.

«Агрэсіўная рыторыка Паўночнаатлантычнага альянсу набывае ўсё больш сістэмны характар. Без якіх-небудзь пагроз з боку Беларусі, без рэальных перадумоў да канфлікту НАТА будуе планы па нарошчванні ваеннай прысутнасці каля граніц і нанясенні ўдараў па тэрыторыі суверэннай дзяржавы, — падкрэсліў Руслан Варанкоў. — Пад прыкрыццём ахоўных фармулёвак блок фактычна рыхтуе глебу для ваеннай эскалацыі і агрэсіі».

У МЗС звярнулі ўвагу, што Беларусь ніколі і нікому не пагражала, а Ваенная дактрына краіны носіць выключна абарончы характар. «Мы паслядоўна выступаем за адкрытасць, дээскалацыю і раўнапраўны дыялог. Заклікаем заходніх калег праявіць разважнасць і прыступіць да сумеснай работы над аднаўленнем узаемнага даверу», — сказаў прэс-сакратар.

Як вядома, у кастрычніку камандуючы Еўрапейскім камандаваннем УС ЗША і вярхоўны галоўнакамандуючы сіламі НАТА ў Еўропе Алексус Грынкевіч прадставіў план НАТА «тэорыя перамогі: як дасягнуць ваеннага поспеху супраць Расіі ў стрымліванні і абароне». Паводле яго слоў, галоўная задача дакумента — паказаць наяўнасць у альянсу падрабязнага плана таго, як прадухіліць напад з боку Расіі, адбіць атаку і разбіць праціўніка, выкарыстоўваючы ўсе наяўныя сілы і сродкі і задзейнічаючы сучасныя распрацоўкі.