Мінпрыроды сумесна з Дзяржінспекцыяй аховы жывёльнага і расліннага свету пры Прэзідэнце Рэспублікі Беларусь з 22 па 28 красавіка праводзіць прыродаахоўную акцыю «Беларусь сінявокая». Яна арганізавана для навядзення парадку і добраўпарадкавання тэрыторый, прылеглых да сацыяльна значных водных аб’ектаў фонду рыбалоўных угоддзяў. Для Віцебшчыны гэтае мерапрыемства з’яўляецца найбольш актуальным, бо рэгіён — самы абваднены сярод усіх абласцей краіны. Тут размяшчаецца больш за 1,3 тыс. азёр, агульная плошча люстэрка якіх складае каля 1 тыс. кв. км.

Сёння ў 10.00 у Віцебскім раёне ў рамках акцыі неабыякавыя грамадзяне добраўпарадкуюць прыбярэжную зону возера Палонскае каля аграгарадка Вораны. Тут збяруцца прадстаўнікі Воранаўскага сельсавета, аблкамітэта прыродных рэсурсаў і аховы навакольнага асяроддзя, тэрытарыяльных органаў Дзяржінспекцыі аховы жывёльнага і расліннага свету, абласной аргструктуры Беларускага таварыства паляўнічых і рыбаловаў, а таксама школьнікі і жыхары, якія імкнуцца берагчы родную прыроду. Возера Палонскае — гэта ўпадабанае месца летняга адпачынку для жыхароў навакольных вёсак і Віцебска, якія ў гарачы час прыязджаюць сюды сем’ямі, каб выкупацца і пазагараць. Менавіта таму сіламі ўсіх ахвотных тут навядуць парадак, каб да пляжнага сезону аматары адпачынку на прыродзе змаглі атрымаць асалоду ад прыемнага баўлення часу. Дарэчы, гэта даволі буйны вадаём, яго даўжыня складае 1,4 км, а аб’ём вады тут дасягае каля 2,2 млн куб. м.

«Правядзенне прыборкі берагавой лініі ў рамках акцыі „Беларусь сінявокая“ запланавана ў кожным раёне вобласці. Так, у Глыбоцкім раёне будуць арганізаваны работы на возеры Белае, у Гарадоцкім — на возеры Лугавое, у Дубровенскім — на вадаёме Бярозкі. Усяго працамі па навядзенні парадку на прылеглых тэрыторыях і падрыхтоўцы да летняга перыяду ў вобласці будуць ахоплены 24 водныя аб’екты», — адзначылі ў аблкамітэце прыродных рэсурсаў і аховы навакольнага асяроддзя.

Унесці ўклад у добраўпарадкаванне і падтрыманне чысціні азёр і рэк можа любы жыхар паўночнага рэгіёна.