Удзельнікі турніру спаборнічаюць у юніёрскай (U18) і маладзёжнай (U23) узроставых катэгорыях. Першы медаль кантынентальнага форуму нашай камандзе прынёс Ілья Слесарэнка, які заняў трэцяе месца ў гонцы з выбываннем сярод атлетаў не старэйшых за 18 гадоў. Апярэдзіць беларуса здолелі аўстрыец Хейма Фугер і расіянін Мацвей Якаўлеў. Усяго за прызы ў гэтым відзе праграмы змагаліся гоншчыкі з 19 краін.

У гэтай жа ўзроставай групе ў дзяўчат наша Яна Данілюк паказала 5-ы вынік у скрэтчы і стала 11-й у гонцы з выбываннем. У заліку сярод моладзі Ірына Чуянкова размясцілася на 9-м радку ў гонцы праследаванняі на 12-й пазіцыі ў скрэтчы, а Паліна Конрад была 13-й у гонцы на вылет. Таксама нашу каманду ў Партугаліі прадставіць Варвара Басякова. Спаборніцтвы на трэку ў Анадыі працягнуцца да 20 ліпеня.