За 9 месяцаў 2025 года беларускія мясаперапрацоўчыя прадпрыемствы рэалізавалі на экспартных таргах Беларускай універсальнай таварнай біржы 42 тыс. т мясапрадуктаў на агульную суму $206,5 млн. Гэта значна больш, чым у студзені — верасні 2024 года: у 5,4 раза ў натуральным выражэнні. Пастаўкі ажыццяўляліся ў Азербайджан, Казахстан, Кітай, Кыргызстан, Расію і Узбекістан. 

Паводле інфармацыі БУТБ, паляпшэнне экспартных паказчыкаў звязана з пашырэннем пула прадаўцоў і пакупнікоў, якія выкарыстоўваюць біржавую пляцоўку, а таксама з запатрабаванасцю беларускіх мясапрадуктаў за мяжой, што стварыла перадумовы для фарміравання ўзыходзячага цэнавага трэнду.

«У параўнанні са студзенем — вераснем мінулага года прыкметна вырасла колькасць удзельнікаў экспартных біржавых таргоў мясной прадукцыяй, якія рэгулярна заключаюць здзелкі. У прыватнасці, пакупнікоў стала ў два разы больш, а прадаўцоў — на трэць. У гэтым годзе мясапрадукты на біржы прадаюць 40 беларускіх прадпрыемстваў, а купляюць — 117 замежных. На экспарт пераважна пастаўляецца мяса буйной рагатай жывёлы. Зыходзячы са статыстыкі продажаў за 9 месяцаў гэтага года, самымі запатрабаванымі пазіцыямі ў нерэзідэнтаў з’яўляюцца замарожаныя і ахалоджаныя кавалкі, блокі з жылаванага мяса і абваленае мяса. Удзельная вага гэтых тавараў у агульнай суме экспартных здзелак з мясапрадуктамі складае 77 %. Што да дынамікі цэн, то рыначную кан’юнктуру, якая склалася на сённяшні дзень, можна лічыць спрыяльнай для айчынных мясаперапрацоўшчыкаў. На фоне высокага попыту на ялавічыну на сусветным рынку найбольш папулярныя віды мясной прадукцыі, якая рэалізуецца на біржавых таргах, істотна выраслі ў цане. Напрыклад, у ліпені — верасні 2025 года замарожаныя блокі з жылаванага мяса ялавічыны з масавай доляй злучальнай і тлушчавай тканкі да 14 % пастаўляліся ў Расію па цане 405-470 расійскіх рублёў за кілаграм, што на 7-13 % вышэй, чым у такім жа перыядзе 2024 года», — расказалі ў прэс-службе БУТБ.

У студзені — верасні 2025 года продажы мяса і мясной прадукцыі забяспечылі звыш 16 % усяго аб’ёму экспартных біржавых здзелак у грашовым выражэнні. Для параўнання: у студзені — верасні 2024 года ўдзельная вага гэтай групы тавараў у экспарце БУТБ складала менш за 3 %.