Беларусь зноў заклікае заходніх суседзяў да аднаўлення дыялогу і практычнага ўзаемадзеяння ў пытаннях кіравання граніцамі. Аб гэтым заявіў прадстаўнік Беларусі на 38-й сесіі пастаяннага камітэта Міжнароднай арганізацыі па міграцыі (МАМ), паведамілі БелТА ў прэс-службе МЗС.
Прадстаўнік беларускай дэлегацыі падкрэсліў, што Беларусь пацвярджае сваю прыхільнасць да супрацоўніцтва з МАМ і іншымі партнёрамі ў справе ажыццяўлення Глабальнага дагавора аб міграцыі і дэкларацыі аб прагрэсе, якая была прынята па выніках другога Міжнароднага форуму па аглядзе міграцыі ў маі гэтага года.
«З улікам Глабальнага дагавора аб міграцыі і дэкларацыі аб прагрэсе, а таксама нацыянальнай Канцэпцыі міграцыйнай палітыкі на 2024-2028 гады ўрад і адпаведныя дзяржаўныя органы будуць прадаўжаць умацоўваць нацыянальную міграцыйную сістэму, удасканальваць заканадаўства, развіваць інфраструктуру лічбавых даных і ажыццяўляць меры па абароне правоў мігрантаў, уключаючы працоўных мігрантаў», — заявіў дыпламат.
Ён адзначыў, што Беларусь надае асаблівае значэнне ўстараненню прычын нелегальнай міграцыі, уключаючы няроўнасць, канфлікты, а таксама наступствы аднабаковых прымусовых мер, якія адмоўна ўплываюць на ўстойлівае развіццё і правы чалавека. Краіна таксама прыхільная да супрацоўніцтва, накіраванага на выратаванне чалавечых жыццяў і прадухіленне гібелі і траўм мігрантаў.
«Беларусь зноў заклікае нашых заходніх суседзяў да аднаўлення дыялогу і практычнага ўзаемадзеяння ў пытаннях кіравання гарніцамі. Беларусь застаецца цвёрдым прыхільнікам Глабальнага дагавора аб міграцыі і надзейным партнёрам МАМ, добрасумленна выконваючы свае фінансавыя абавязацельствы перад арганізацыяй. Мы падтрымліваем падыход МАМ аб тым, што кіраванне міграцыяй патрабуе практычных, збалансаваных і заснаваных на супрацоўніцтве падыходаў, а ізаляваныя нацыянальныя дзеянні не могуць эфектыўна забяспечыць бяспечную, упарадкаваную і легальную міграцыю», — сказаў прадстаўнік Беларусі.
У якасці прыярытэтных напрамкаў супрацоўніцтва беларускі бок бачыць умацаванне нацыянальнага патэнцыялу ў сферы бяспечнай, упарадкаванай і легальнай міграцыі, процідзеянне гандлю людзьмі і абарону яго ахвяр, удасканаленне палітыкі ў галіне працоўнай міграцыі.
«Беларусь высока цэніць экспертную і тэхнічную падтрымку МАМ. Разлічваем на прадаўжэнне канструктыўнага ўзаемадзеяння ў новым кантэксце пераўтварэння прысутнасці МАМ у Беларусі», — рэзюмаваў дыпламат.
