Наша спартсменка атрымала перамогу ў вагавой катэгорыі да 63 кг сярод дзяўчат да 23 гадоў. У рыўку Майсеевіч справілася са штангай вагой 95, 98 і 100 кг, заваяваўшы тым самым малы залаты медаль у гэтым практыкаванні. У лепшай спробе ў штуршку Дыяна падняла 119 кг, што прынесла ёй малую бронзу. Чэмпіёнскі вынік беларускі ў дваябор’і склаў 219 кг, што на тры кілаграмы больш за суму сярэбранага прызёра з Турцыі Айсель Озкан. Тройку прызёраў замкнула францужанка Малін Мішэль (212 кг). Раней сёлета Майсеевіч узяла бронзу ў рыўку на дарослым ЧЕ ў Малдове.

Таксама 31 кастрычніка беларуска Кацярына Цімашэнка (U20, да 63 кг) заняла восьмае месца ў вазе да 63 кг у дзяўчат да 20 гадоў, а яе суайчынніца Іна Мельянец была ў гэтай жа катэгорыі 12-й. На дадзены момант у актыве нашых атлетаў 7 узнагарод кантынентальнага форуму (3-2-2), напярэдадні золата і два сярэбраныя заваяваў Ягор Папоў (U23, да 71 кг), а Артур Якушаў стаў бронзавым прызёрам у штуршку (U20, да 71 кг).

Усяго спаборніцтвы ў Дурэсе сабралі больш за 400 юных штангістаў з 42 краін, у склад беларускай каманды ўвайшлі 22 спартсмены. У суботу на албанскі памост выйдуць нашы Марыя Іванова (U20, да 69 кг), Андрэй Фралоў і Раман Нязмоў (абодва — U23, да 79 кг). Чэмпіянат Еўропы па цяжкай атлетыцы сярод юніёраў і моладзі працягнецца да 4 лістапада.