На старце спаборніцтваў у вазе да 75 кг Нгуен адолеў датчаніна Крыстафера Нільсена, пасля чаго прайграў будучаму пераможцу — Раікі Фуната з Японіі. У суцяшальнай сетцы Дэвід прайшоў атлетаў з Францыі і Славеніі, але ў паядынку за права выйсці ў «бронзавую» сутычку мінімальна ўступіў немцу Раману Райсвіху (9:10). У агульнай табліцы Нгуен заняў сёмае месца сярод 95 удзельнікаў.

Усяго ў Зальцбургу выступілі больш за 1200 каратыстаў з 82 краін, нашу каманду прадставілі 11 спартсменаў. У дзяўчат далей за іншых прабілася Марыя Азарава (да 61 кг), якая спынілася на стадыі адной восьмай фіналу.

На папярэднім турніры Серыі А, які праходзіў у лютым у кіпрскай Ларнацы, беларус Іван Кудзінаў заваяваў золата ў катэгорыі звыш 84 кг. Заключны этап Серыі А па каратэ 2025 года адбудзецца ў сталіцы Малайзіі Куала-Лумпуры ў пачатку кастрычніка.