Як паведамлялася раней, з 17 лістапада «Белавія» пераходзіць на дзённыя рэйсы па маршруце Мінск — Батумі.

— Лётаць на гэты грузінскі курорт авіякампанія будзе двойчы на тыдзень, — адзначылі ў РСТА. — Гэта добра для арганізацыі тураў у Батумі з Беларусі на некалькі дзён.

Спецыялісты лічаць, што ў Батумі турыстам у міжсезонне будзе цікава. У прыватнасці, ім спадабаюцца прагулкі па набярэжнай і старым горадзе: даўжыня Прыморскага бульвара складае каля 10 км, а тэмпература паветра зімой тут у сярэднім роўная 10-12 градусам цяпла. Акрамя таго, зімой Аджарыя ідэальна падыходзіць для гастранамічных тураў, наведвання нацыянальных рэстаранаў. Можна схадзіць у знакаміты Батумскі дэльфінарый, этнаграфічны музей «Борджгала» або Музей выяўленчых мастацтваў Аджарыі. Яшчэ адзін варыянт пазнавальна правесці час — наведаць Батумскі батанічны сад, адзін з найбуйнейшых і найпрыгажэйшых субтрапічных паркаў свету.

Сезонны пункт прыцягнення — гарналыжны курорт Гадзердзю за 110 кіламетраў ад Батумі.

— Ён менш вядомы на беларускім рынку, чым Гудауры, але таксама валодае ўсімі магчымасцямі для паўнавартаснага катання, — заўважылі ў РСТА. — У Гадзердзю ўстаноўленая двухузроўневая канатная дарога. Вышыня схілаў — ад 1724 да 2366 метраў над узроўнем мора. Курорт славіцца вялікай колькасцю снегу дзякуючы блізкасці да Чорнага мора.

Акрамя таго, беларускія тураператары ўжо пачалі продаж навагодніх тураў у Батумі. У РСТА расказалі, што ўзімку курортны горад ператвараецца ў зіхатлівую казку — вуліцы і плошчы ўпрыгожаны ілюмінацыяй, і ў дадзены момант гатэлі рыхтуюць запальныя святочныя праграмы. Як паведамляюць рэгіянальныя СМІ, сёлета Батумі ўпрыгожаць у марской тэматыцы, у горадзе з’явіцца шмат навагодніх забаў для дзяцей.