Беларускі Ульяна Малчанава, Соф’я Ліцкевіч і Яна Міневіч заваявалі бронзу ў камбінаванай праграме груп, якая спалучае статычныя і тэмпавыя элементы. Удзел у фінале прынялі спартсменкі з 10 краін, за сваё выступленне нашы дзяўчаты атрымалі 28,460 бала і занялі трэцяе месца ўслед за камандамі Кітая і ЗША.

У барацьбе за медаль беларускі ўсяго на 0,02 ачка абышлі каманды Украіны і Расіі. Днём раней Малчанава, Ліцкевіч і Міневіч занялі чацвёртае месца ў дынамічных практыкаваннях, вечарам 27 верасня Ульяна, Соф’я і Яна пазмагаюцца за прызы ў балансавых практыкаваннях.

Раней у нядзелю нашы Адрыян Трафімовіч і Дар’я Мінюк паказалі восьмы рэзультат у спаборніцтвах змешаных пар. Усяго планетарны форум па спартыўнай акрабатыцы ў Італіі сабраў больш як 250 атлетаў з трыццаці краін.