Штогадовы семінар кіраўнікоў дыпламатычных прадстаўніцтваў і консульскіх устаноў Беларусі, у якім бяруць удзел 59 кіраўнікоў дыпмісій, стартаваў ў Мінску.
«Кожны год мы праводзім такія мерапрыемствы з кіраўнікамі нашых загранустаноў — пасламі, генеральнымі консуламі, часовымі паверанымі ў справах. Самая галоўная задача — акунуць паслоў, якія праводзяць час пераважна за мяжой, у беларускія справы», — сказаў міністр замежных спраў Рэспублікі Беларусь Максім Рыжанкоў у каментарыі журналістам перад пачаткам семінара.
Паводле слоў міністра, дыпламаты павінны вельмі выразна разумець краіну, якую прадстаўляюць за мяжой. «Рытм жыцця дзяржавы яны павінны адчуваць. У сувязі з гэтым большая частка семінара будзе прысвечана розным пытанням сацыяльна-эканамічнага развіцця краіны, рэалізацыі інфраструктурных праектаў, палітычных падзей, зрэзу грамадскага жыцця ў дзяржаве», — растлумачыў Максім Рыжанкоў.
Значная частка семінара будзе прысвечана прыкладным пытанням, якімі дыпламатам даводзіцца займацца штодзённа і выканання якіх патрабуе Прэзідэнт. У першую чаргу гэта рэалізацыя сумесных праектаў прамысловай кааперацыі, нарошчванне экспарту, вырашэнне пытанняў па павелічэнні гандлю паслугамі.
Акрамя таго, шэраг сустрэч будзе прысвечаны азнаямленню паслоў з магчымасцямі фінансавага забеспячэння гандлю. Ім прадставяць найлепшыя практыкі, дзякуючы якім Беларусь ва ўмовах санкцыйных абмежаванняў знаходзіць магчымасці гандляваць з усім светам. Увага таксама будзе ўдзелена пытанням большага выкарыстання ІT-тэхналогій у рабоце. Арганізаваны шэраг сустрэч з прадстаўнікамі бізнесу і інш.
У праграме штогадовага семінара — дзелавыя сустрэчы з прадстаўнікамі кіраўніцтва Еўразійскай эканамічнай камісіі, БелГПП, шэрагу ведамстваў Беларусі, а таксама кіраўнікамі ключавых дзяржаўных арганізацый і інш. Запланаваны нарады з кіраўніцтвам урада. Адбудуцца і двухбаковыя сустрэчы кіраўнікоў беларускіх дыпмісій з кіраўнікамі міністэрстваў, канцэрнаў і прадпрыемстваў-экспарцёраў.
Беларускія дыпламаты наведаюць СЗАТ «БЕЛДЖЫ» — гэта беларуска-кітайскае сумеснае прадпрыемства, аўтамабільны завод і вытворца легкавых аўтамабіляў марак Geely і Belgee.
Цэнтральным мерапрыемствам штогадовага семінара стане прэзентацыя кнігі «Наш Прэзідэнт» на англійскай мове з удзелам Максіма Рыжанкова, аўтарскага калектыву выдання і кіраўнікоў загранустаноў Беларусі і дыпламатычнага корпуса, акрэдытаванага ў краіне. Акрамя таго, кіраўнікі беларускіх дыпмісій возьмуць удзел у конкурсе «Найлепшы экспарцёр 2025 года».
Па выніках семінара, які будзе праходзіць да 31 ліпеня, на нарадзе міністра з кіраўнікамі загранустаноў будуць падведзены вынікі работы дыпламатычных прадстаўніцтваў, уключаючы эфектыўнасць знешнепалітычных і знешнеэканамічных ініцыятыў, узаемадзеянне з партнёрамі, унёсак у пашырэнне экспарту, і пастаўлены задачы на перспектыву.
Паводле БелТА
