Перамогу ў катэгорыі да 97 кг атрымаў Уладзіслаў Казлоў — у час спаборніцтваў беларус абышоў спартсменаў з Чылі і Польшчы, фінал супраць румына Дзяніса Лукаша не адбыўся з-за траўмы саперніка. У вазе да 125 кг нашы атлеты ўзялі адразу дзве ўзнагароды: Павел Дзятлаў у схватцы за золата быў мацнейшы за Амара Сарэма з Румыніі, а Сцяпан Мандрык у паядынку за бронзу перамог малдаваніна Дзмітрыя Дускова. Акрамя таго, у катэгорыі да 57 кг сярэбраным прызёрам стаў Арцём Паўлючэнка.

8 жніўня за залатыя медалі турніру ў Бухарэсце паспаборнічаюць нашы Магамедхан Магамедханаў (да 65 кг) і Мікіта Дзмітрыеў (да 74 кг). Усяго беларускую каманду ў сталіцы Румыніі прадстаўляюць 13 чалавек. Спаборніцтвы з’яўляюцца этапам падрыхтоўкі да маладзёжнага чэмпіянату свету ў ЗША і дарослага ЧС у Казахстане, якія пройдуць у кастрычніку.