Сакратар Цэнтральнай выбарчай камісіі Алена Балдоўская будзе назіраць за выбарамі дэпутатаў Жагорку Кенеша (Вярхоўнага Савета — аднапалатнага нацыянальнага парламента). Яна ўжо сустрэлася са старшынёй ЦВК Кыргызстана і прыступіла да наведвання тэрытарыяльных і акруговых выбарчых камісій, а таксама да назірання за ходам галасавання па-за памяшканнем.
У складзе маніторынгавай групы ад МПА СНД — член Савета Рэспублікі Глеб Лапіцкі. Падчас сустрэчы з кіраўніцтвам Генеральнай пракуратуры Кыргызстана бакі абмеркавалі ход электаральнай кампаніі з прадстаўнікамі Генеральнай пракуратуры Кыргызскай Рэспублікі на чале з першым намеснікам генеральнага пракурора Баймурзай Маатавым. Абмяркоўваліся пытанні агітацыйнай працы ў сацыяльных сетках, цыфравізацыі галасавання, барацьбы з выкарыстаннем адміністрацыйнага рэсурсу ў перадвыбарных мэтах.
- У ліку міжнародных назіральнікаў ад ПА АДКБ — член Пастаяннай камісіі Палаты прадстаўнікоў Нацыянальнага сходу па нацыянальнай бяспецы Анатоль Булаўка. Напярэдадні выбараў прайшла сустрэча назіральнікаў ад ПА АДКБ са старшынёй судовай калегіі па адміністрацыйных справах Вярхоўнага Суда Кыргызскай Рэспублікі Нургуль Бакіравай. Асаблівую ўвагу падчас абмеркавання надалі пытанням судовай абароны выбарчых правоў грамадзян, парадку разгляду скаргаў і зваротаў, звязаных з ходам выбарчай кампаніі, а таксама ролі судоў у забеспячэнні законнасці і празрыстасці выбараў.
У верасні дэпутаты Жагорку Кенеша прынялі рашэнне аб самароспуску, каб правесці выбары датэрмінова і павялічыць часавы перыяд паміж парламенцкімі, якія былі запланаваны на лістапад 2026 года, і прэзідэнцкімі, запланаванымі на Студзень 2027 года, выбарамі. Праходзіць выбары будуць па новай сістэме.
Усяго зарэгістравана 467 кандыдатаў. Кожны выбаршчык можа аддаць голас толькі за аднаго кандыдата. Амаль 4,3 млн выбаршчыкаў змогуць прагаласаваць на 2492 выбарчых участках у Кыргызстане, а таксама на 100 участках у 34 замежных краінах.
Грамадзяне Кыргызстана, якія пражываюць або часова знаходзяцца ў Рэспубліцы Беларусь, змогуць прагаласаваць 30 лістапада па адрасе: Мінск, вул.Старавіленская, 57, на ўчастку для галасавання № 9023 з 8.00 да 20.00 па мясцовым часе.
