Дзяржпагранкамітэт атрымаў афіцыйнае апавяшчэнне польскага боку аб адкрыцці 17 лістапада пунктаў пропуску «Кузніца Беластоцкая» і «Баброўнікі». Беларускія памежнікі гатовыя да аднаўлення руху ў пунктах пропуску ў поўным аб’ёме, паведамілі ў ДПК Беларусі.

У панядзелак, 17 лістапада, з 2:00 па беларускім часе ўлады Польшчы плануюць адкрыць пункты пропуску «Кузніца Беластоцкая» (з беларускага боку «Брузгі») і «Баброўнікі» (з беларускага боку «Бераставіца»). Адпаведнае афіцыйнае апавяшчэнне ад Памежнай варты Рэспублікі Польшча ўвечары 14 лістапада паступіла ў Дзяржпагранкамітэт.

Паводле інфармацыі польскага боку, праз пункт пропуску «Кузніца Беластоцкая» (з беларускага боку «Брузгі») будзе дазволены толькі рух легкавога транспарту. Адпаведна перасячэнне мяжы легкавымі і грузавымі аўтамабілямі, а таксама аўтобусамі будзе праводзіцца ў пункце пропуску «Баброўнікі» (з беларускага боку «Бераставіца»). 

Органы памежнай службы гатовыя да аднаўлення руху ў пунктах пропуску ў поўным аб’ёме, падкрэслілі ў Дзяржпагранкамітэце.

Беларускі мытны камітэт, у сваю чаргу, праінфармаваў: 17 лістапада з 2.00 па беларускім часе будуць адкрыты польскія пункты пропуску «Кузніца Беластоцкая» і «Баброўнікі», аб чым афіцыйна паведамлена беларускаму боку. Адпаведную пастанову падпісаў учора міністр унутраных спраў і адміністрацыі Польшчы.

Праз «Кузніцу Беластоцкую» будзе дазволены толькі пасажырскі рух, за выключэннем аўтобусаў, а праз «Баброўнікі» — легкавых аўтамабіляў і аўтобусаў, а таксама грузавікоў з краін ЕС, краін —удзельніц Пагаднення аб Еўрапейскай эканамічнай прасторы і Швейцарыі.

Адкрыццё яшчэ двух польскіх пунктаў пропуску дасць магчымасць палепшыць сітуацыю ў прыграніччы, адзначаецца ў паведамленні Дзяржаўнага мытнага камітэта Беларусі.

Прадстаўнік урада Польшчы Адам Шлапка пазней паведаміў, што пагранічныя пераходы ўсё ж плануецца адкрыць «прыкладна ў сярэдзіне лістапада». Прадстаўнікі бізнесу Польшчы не раз падкрэслівалі, што адкрыццё пагранічных пераходаў з Беларуссю ў Падляскім ваяводстве вельмі важнае для эканомікі ўсходняй Польшчы. І не толькі.

У Падляскім ваяводстве, як пісалі польскія СМІ, цяпер праводзяцца інтэнсіўныя падрыхтоўчыя работы, накіраваныя на больш хуткае адкрыццё пунктаў пропуску на гарніцы з Беларуссю ў Баброўніках і Кузніцы. Каардынацыю гэтых работ ажыццяўляе Падляскі ваявода Яцэк Бжазоўскі

У ДМК Беларусі адзначылі, што мытныя органы нашай краіныпоўнасцю гатовы да аднаўлення руху ў сумежных беларускіх пунктах пропуску «Брузгі» і «Бераставіца» — мытныя змены ўкамплектаваны, інфраструктура ўдасканалена, усе тэхнічныя сродкі функцыянуюць.

Як вядома, пагранічны пераход «Кузніца» быў закрыты ў лістападзе 2021 года, а пункт пропуску «Баброўнікі» — у лютым 2023 года.

А вось міністэрства замежных спраў Літвы да гэтага часу так і не дало свой адказ на зробленую тры дні таму прапанову беларускага боку аб правядзенні перагавораў паміж двума знешнепалітычнымі ведамствамі для пошуку шляхоў вырашэння сітуацыі на беларуска-літоўскай граніцы.Літоўскі прэм’ер Інга Ругіненэ 30 кастрычніка заявіла, што адкрыццё гэтых пагранічных пераходаў адкладаецца. Паводле яе, такая дамоўленасць была дасягнутая пасля яе перагавораў з Тускам.

Каму гэта выгадна? Відаць, нікому. А хто праграе? Адказ таксама відавочны — простыя грамадзяне, у тым ліку тысяч аўтаперавозчыкаў, яны самі, іх сем’і, кампаніі. Вырашаць гэтае пытанне літоўскау боку. Чым хутчэй гэта будзе зроблена, тым лепш будзе для ўсіх.

Данііл ХМЯЛЬНІЦКІ

Фота БелТА