«Рэспубліка Беларусь заўсёды прытрымлівалася і прытрымліваецца прынцыпаў мірнага ўрэгулявання ўсіх спрэчных пытанняў. І цяпер мы заклікаем да таго, каб гэты канфлікт быў спынены і ўсе рознагалоссі вырашаліся толькі палітыка-дыпламатычнымі метадамі. Мы супраць эскалацыі канфлікту на Блізкім Усходзе. Мы за тое, каб гэты канфлікт быў спынены і не была дапушчана эскалацыя ў гэтым рэгіёне», — сказаў Генадзь Ляпешка.

Старшыня Пастаяннай камісіі Палаты прадстаўнікоў па нацыянальнай бяспецы Генадзь Ляпешка і старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Алейнік сёння сустрэліся з кіраўніком дыпмісіі Алірэзой Санеі і пакінулі запіс у кнізе спачуванняў.

«Мы выказваем шчырае спачуванне ўсяму іранскаму народу ў сувязі з гібеллю мірнага, ні ў чым не вінаватага насельніцтва, у сувязі з гібеллю аяталы, у сувязі з гібеллю асабліва дзяцей. Мы глыбока ўзрушаны дзеяннямі Ізраіля, што падтрымліваецца Злучанымі Штатамі Амерыкі, у адносінах да дружалюбнай нам краіны», — сказаў Генадзь Ляпешка.

Кіраўнік дыпмісіі Алірэза Санеі звярнуў увагу, што сапраўдныя сябры пазнаюцца ў бядзе, і адзначыў падтрымку кіраўніцтва і народа Беларусі ў розных сітуацыях. Пасля цяперашніх вядомых падзей грамадзяне Беларусі з першага дня, з першых гадзін прыходзілі да пасольства Ірана і ўскладалі кветкі, выказвалі спачуванне і салідарнасць.

«Як дружалюбныя незалежныя краіны могуць нас падтрымліваць? Перш за ўсё ў выказванні спачування, падтрымкі. Гэта можа быць на ўзроўні і палітычным, і маральным, і духоўным. Таксама мы можам падтрымліваць адзін аднаго ў міжнародных арганізацыях, супольнасцях, ААН, — сказаў ён. — Палітычная падтрымка з боку дружалюбных краін для нас мае вялікае значэнне і можа садзейнічаць вырашэнню пытанняў».

Надзвычайны і Паўнамоцны Пасол Ісламскай Рэспублікі Іран у Беларусі падкрэсліў, што цяперашняя сітуацыя вельмі складаная для іранскага народа. «Вайна — гэта не наш выбар. Мы выбралі перагаворы, дыпламатыю», — сказаў ён, звярнуўшы ўвагу, што вераломная атака адбылася ў той перыяд, калі вяліся перагаворы.

Кіраўнік дыпмісіі дадаў, што нападзенне з’яўляецца парушэннем міжнароднага права. «На аснове арт. 51 Статута ААН мы лічым легітымным сваім правам абараніць сябе», — адзначыў ён.

У кнізе спачуванняў, якая адкрыта ў пасольстве Ісламскай Рэспублікі Іран у Беларусі, прадаўжаюць пакідаць запісы, каб ушанаваць памяць аб вярхоўным лідары Ірана, аятале Алі Хаменеі і ахвярах атак, учыненых на тэрыторыю Ірана, а таксама ў знак спачування і салідарнасці родным і блізкім загінулых і пацярпелых ад гэтых атак. Кніга спачуванняў адкрыта з 4 па 6 сакавіка (з 10.00 да 13.00 і з 15.00 да 17.00) у пасольстве Ісламскай Рэспублікі Іран у Мінску па адрасе Старавіленскі тракт, 11.