У заключны дзень турніру скарбонка нашай каманды папоўнілася адразу на пяць узнагарод. Сярэбраным прызёрам у вазе да 65 кг стала Даніэла Ждан: беларуска прайшла ўдзельніц з Турцыі, Грузіі і Балгарыі, але ў фінале ўступіла расіянцы Кацярыне Дарашэнка. Перамогі ў паядынках за трэцяе месца атрымалі Алена Бурдэнка, Мар’яна Жукавец і Арсеній Маліцкі, у баявым самба Яўген Міхно атрымаў «бронзу» пасля паражэння ў паўфінале.

З Тбілісі нашы спартсмены прывязуць дзве залатыя, дзве сярэбраныя і шэсць бронзавых узнагарод.

Напярэдадні перамогі на чэмпіянаце Еўропы атрымалі Данііл Патачыц (да 98 кг) і Марыя Кандрацьева (звыш 80 кг), месцы на подыуме ў сваіх катэгорыях занялі Анфіса Капаева, Таццяна Мацко і Анжэла Жылінская. Прызёрамі спаборніцтваў сталі ўсе прадстаўніцы нашай жаночай каманды.

Усяго кантынентальны форум сабраў у Грузіі больш за 200 атлетаў з 23 краін. На леташнім чэмпіянаце Еўропы па самба на Кіпры беларускія спартсмены таксама заваявалі дзесяць медалёў.

Прэзідэнт НАК Беларусі Віктар Лукашэнка павіншаваў нацыянальную каманду па самба з паспяховым выступленнем на кантынентальным форуме ў Тбілісі.

«Дзякуючы прафесіяналізму, упартасці, працавітасці і волі да перамогі вы дастойна прадставілі нашу родную Беларусь пад нацыянальнымі сімваламі, зноў пакарыўшы пастаменты чэмпіянату Еўропы. Беларуская школа самба традыцыйна ярка праяўляе сябе на міжнароднай арэне, аб’ядноўваючы аднадумцаў і высакакласных спецыялістаў, якія любяць сваю справу і вядуць каманду да поспеху», — адзначыў Віктар Лукашэнка.

Дарэчы, у медальным заліку зборная Беларусі заняла чацвёртае месца сярод 23 краін — удзельніц турніру.