Заключным відам праграмы турніру стаў фінал у мужчынскіх сінхронных скачках. Беларусы Іван Літвіновіч і Андрэй Буйлоў набралі 53,38 бала і занялі другое месца следам за партугальцамі Лукашам Сантушам і Габрыэлем Альбукерке (54,23). Тройку прызёраў замкнулі прадстаўнікі Азербайджана Гусейн Абасаў і Магсуд Магсудаў (51,73).

Такім чынам, з Каімбры нашы батутысты прывязуць два залатыя і тры сярэбраныя медалі. Перамогу ў жаночых індывідуальных скачках атрымала Кацярына Яршова, другі рэзультат паказала Віялета Бардзілоўская. Акрамя таго, Яршова ў пары са Златай Мініахметавай святкавалі поспех у сінхронных скачках, а Літвіновіч узяў серабро ў асабістым заліку.

На першым этапе Кубка свету ў Баку беларускія спартсмены заваявалі чатыры медалі (3-1-0), на другім турніры ў галандскім Алкмары — пяць (3-1-1), на трэцім старце ў Швейцарыі — чатыры (1-1-2). Пяты этап пройдзе ў пачатку кастрычніка ў Італіі.