Раз на 10 гадоў органы беларускай статыстыкі праводзяць абследаванне бюджэту часу насельніцтва. «Тут ёсць цікавыя нюансы. Апошнія атрыманыя даныя дазваляюць убачыць асаблівасць размеркавання часу паміж жанчынамі і мужчынамі, асабліва калі ў сям’і ёсць дзеці. Час на аплатную працу ў жанчын у такіх сем’ях складае ў сярэднім на чвэрць менш, чым у мужчын», — патлумачыла Наталля Тарасюк.

Пры гэтым на неаплатную працу па вядзенні хатняй гаспадаркі, догляд членаў сям’і, мужа, дзяцей, затрачваецца жанчынамі амаль у два разы больш, чым мужчынамі. «Калі скласці гэтыя аспекты, гэтыя віды дзейнасці, то агульная працоўная нагрузка ў жанчын аказваецца вышэйшай, чым у мужчын. Яны працуюць у сярэднім 10 гадзін у дзень, а мужчыны — на гадзіну менш. Адпаведна, калі мы ўлічваем такія аспекты, як сон, догляд сябе і іншыя нейкія паўсядзённыя патрэбы мужчын і жанчын, то ў выніку вольнага часу ў жанчын на адну гадзіну менш, чым у мужчын», — падагульніла намеснік старшыні.