З 7 па 11 мая інвалідам і ўдзельнікам Вялікай Айчыннай вайны прадастаўлены бясплатныя міжгароднія тэлефонныя размовы (званкі па Беларусі).

Бясплатныя міжгароднія тэлефонныя размовы прадастаўляюцца ў перыяд з 00.00 гадзін 7 мая да 24.00 11 мая аўтаматычным спосабам з кватэрных тэлефонаў, абанентамі якіх з’яўляюцца асобныя катэгорыі грамадзян. Гэта, у прыватнасці, Героі Савецкага Саюза, поўныя кавалеры ордэна Славы, удзельнікі і інваліды Вялікай Айчыннай вайны, асобы, якія прымалі ўдзел у складзе спецыяльных фарміраванняў у размініраванні тэрыторый і аб’ектаў пасля вызвалення ад нямецкай акупацыі ў 1943-1945 гадах, тыя, хто ўзнагароджаны ордэнамі і (або) медалямі СССР за самаадданую працу і бездакорную воінскую службу ў тыле.    

Таксама акцыя распаўсюджваецца на тых, хто працаваў на аб’ектах супрацьпаветранай абароны, мясцовай супрацьпаветранай абароны, на будаўніцтве абарончых збудаванняў, марскіх баз, аэрадромаў і іншых ваенных аб’ектаў у межах тылавых межаў дзеючых франтоў, на прыфрантавых участках чыгунак і аўтамабільных дарог, хто працаваў на прадпрыемствах, ва ўстановах і арганізацыях Ленінграда ў перыяд блакады, інвалідаў з дзяцінства з прычыны ранення, кантузіі, калецтва, звязаных з баявымі дзеяннямі ў перыяд ВАВ і інш.    

Даведачную інфармацыю па прадастаўленні бясплатных міжгародніх тэлефонных размоў можна атрымаць па тэлефоне 153. 

Умовы акцыі не распаўсюджваюцца на размовы з абанентамі сотавых рухомых сетак і карыстанне платнымі даведачна-інфармацыйнымі службамі, арганізаванымі па міжгароднім прынцыпе.

Па традыцыі «Белтэлекам» штогод падаўжае тэрмін дзеяння акцыі «Дзень Перамогі з ZALA», у рамках якой інваліды і ветэраны Вялікай Айчыннай вайны могуць бясплатна падключыцца да базавага пакета «Стандарт ТБ» эфірнага ТБ ZALA і да базавага пакета «Прэм’ера» інтэрактыўнай ТБ. 

Падключэнне новых абанентаў да паслуг тэлебачання ажыццяўляецца пры наяўнасці тэхнічнай магчымасці. 

Даведачную інфармацыю можна даведацца ў сэрвісных цэнтрах і па тэлефоне 123.