Да канца 2025 года Маскоўскі метрапалітэн плануе запусціць рух цягнікоў без машыністаў. Пасля паспяховага ўкаранення тэхналогіі яна можа быць адаптавана і для мінскага метро. Пра гэта паведамілі прадстаўнікі маскоўскай падземкі ў рамках святкавання яе 90-годдзя, паведамляе mlyn.by.
Гаворка ідзе пра склад серыі «Масква-2024», якія ўжо курсіруюць па маскоўскім метро і па трэцяй (зялёнай) лініі мінскай падземкі.
Тэставыя выпрабаванні пачнуцца ў найбліжэйшыя месяцы. На першым этапе машыністы будуць заставацца ў кабіне для кантролю, а абкатка новых тэхналогій будзе праходзіць ноччу і без пасажыраў.
Запуск першых беспілотных рэйсаў плануецца па Вялікай кальцавой лініі ў Маскве.
- Галоўная задача — забяспечыць бяспечны рух пры інтэрвалах 60-90 секунд, чаго пакуль не ўдалося дасягнуць ні ў адным метрапалітэне свету.
У будучым такія тэхналогіі могуць быць укаранёны і ў іншых краінах СНД, у тым ліку Беларусь. Маскоўскі метрапалітэн выказаў гатоўнасць дзяліцца напрацоўкамі з партнёрамі.
