У матчы 1/8 фіналу яны перамаглі ў дзвюх партыях індыйска-амерыканскі дуэт Сварманью Сінгх / Закары Мінц — 6:3, 6:4. У гульні за выхад у паўфінал Бетаў і Духан будуць сапернічаць з нямецка-брытанскім дуэтам Арон Функ / Фін Рэйлі. Сёння Сяргей Бетаў сустрэнецца з Фінам Рэйлі ў паядынку 1/16 адзіночнага разраду.

У першым раўндзе турніру серыі ATP Challenger-125 у амерыканскім Тыб’юране беларускі тэнісіст Эрык Аруцюнян уступіў амерыканцу Брэйдэну Шыку — 3:6, 4:6. У асноўную сетку гэтых спаборніцтваў Аруцюнян прабіўся праз кваліфікацыю, перамогшы двух амерыканскіх тэнісістаў — Спенсера Джонсана і Нікаласа Годсіка. Беларус Данііл Астапенкаў спачатку выйграў у амерыканца Гаса Грумэ, а ў вырашальнай гульні за выхад у асноўную сетку ўступіў французу Цімо Легу.

У 1/16 фіналу жаночага турніру WTA-500 у мексіканскай Гвадалахары беларуска Ірына Шымановіч прайграла турэцкай тэнісістцы Зейнеп Сонмез — 1:6, 1:6. На старце парнага разраду Шымановіч і чэшка Мірыям Шкох уступілі амерыканскаму тандэму Кэтрын Харысан / Далайна Х’юіт — 2:6, 3:6.

Турніры ў Егіпце, Мексіцы і ЗША завершацца 20 верасня.