Рабочы графік Прэзідэнта штотыдзень надзвычай насычаны. І тэмы, якім Кіраўнік дзяржавы надае пільную ўвагу, самыя разнастайныя: эканоміка, бяспека, сацыяльная сфера, прамысловасць, грамадска-палітычная абстаноўка і многае іншае. Кожную тэму Аляксандр Лукашэнка вывучае дэталёва, абавязкова робіць акцэнт на праблемах, але і не забывае пра станоўчыя моманты. Ацэнкі Прэзідэнта заўсёды трапныя і змястоўныя. А даручэнні і парады — канкрэтныя.

Мінулы тыдзень у Прэзідэнта быў неверагодна насычаным і разнапланавым. Аляксандр Лукашэнка наладжваў масты з Калінінградскай вобласцю, сустракаўся з кітайскімі гасцямі. У прэзідэнцкім графіку знайшлося месца і для хоць і рабочых, але вызначальных мерапрыемстваў. Кіраўнік дзяржавы разбіраўся ў праблемах беларускага кінематографа і расстаўляў задачы для свайго палітычнага штаба — Адміністрацыі Прэзідэнта. Аляксандр Лукашэнка паспеў і папрацаваць у рэгіёнах: паездка ў Брэсцкую вобласць была прысвечана беспілотным лятальным апаратам, а ў Гродненскую вобласць — вытворчасці дзіцячага харчавання. 

І ўсё гэта за адзін тыдзень! 

1. «Калінінградцы — разумныя, працавітыя, мудрыя людзі. Прыкладна такія, як беларусы, — заўважыў Прэзідэнт. — Можам дзесьці недапрацаваць, але ў нас ёсць у каго вучыцца: давайце будзем шчырыя, еўрапейцы ў гэтым плане малайцы. Я часта прыводжу ў прыклад дэфіцыт працоўных рэсурсаў. Паехалі да нас людзі з вядомых рэгіёнаў. Нашы кажуць: „Ну як гэта так?“. Кажу: добра, ніякіх мігрантаў, але тады прадукцыйнасць працы трэба, як у Еўрасаюзе, — у 3-5 разоў вышэйшая». Чаму? Таму што калі мы не будзем канкурэнтнымі з Еўрапейскім Саюзам, нам няма чаго там рабіць. Асабліва Калінінграду і Беларусі, таму што ў нас тая эканоміка, якая ўласцівая ўсяму Еўрапейскаму саюзу і з імі трэба канкурыраваць«. На сустрэчы з губернатарам Калінінградскай вобласці Аляксеем Бяспрозванных беларускі лідар выказаў упэўненасць, што ўсе жыццёвыя пытанні будуць вырашаныя, галоўнае, не ствараць дадатковых цяжкасцей. І гэта праца сапраўды, таго вартая, паколькі, заўважыў кіраўнік дзяржавы, на агульнай вялізнай прасторы трэба ўсё. 

2. «Я вам шчыра кажу тое, што мог бы не сказаць сялянам або рабочаму каля станка. Без вас мы можам абысціся. Таму я адкрыта кажу: так — так, не — не. Усё роўна вас няма, мы нічога не губляем, дзяржава. Калі б было што губляць, то вядома. А што губляем мы? У мяне выйсця іншага няма: або — або. Таму я кажу міністру, кіраўніку „Беларусьфільма“: не будзе выніку — вельмі жорсткае стаўленне. Я ў вас спытаў: вы гатовыя, ведаеце сітуацыю? Гатовыя. Ідзіце — давайце вынік. Не дасце — лічыце, што вы мяне падманулі. Не дасце — ну, адпаведнае стаўленне. Таму не крыўдуйце. Я не кажу, што так будзе, але, калі раптам крайні варыянт, — ну што, мы нічога не губляем», — такая катэгарычная заява Прэзідэнта ў адрас кіношнікаў можа здасца нават жорсткай, але насамрэч яна цалкам абгрунтаваная. Наведваючы кінастудыю «Беларусьфільм», Аляксандр Лукашэнка падкрэсліў, што ўсе дзяржаўныя ўкладанні ў айчыннае кіно ніякай аддачы не далі. Дзяржаўны аванс беларускае кіно не адпрацавала, нават страціла тое, што ўжо мела. Таму Прэзідэнт паставіў жорсткае патрабаванне — да 1 верасня навесці парадак у сферы і нарэшце ўжо пачаць радаваць аўдыторыю добрым прадуктам, якога яна зачакалася. У адваротным выпадку — дзяржава нічога не губляе і без кіношнікаў. Але Прэзідэнт адзначыў, што, як і многія, сам ён не хоча такога развіцця падзей і заклікаў не даводзіць сітуацыю да абсурду.

3. «Сёння няма тых пытанняў, якія не мелі б палітычны характар. Апошняя інстанцыя перад прыняццем канчатковага рашэння, вы не павінны ні ў якім разе ўваходзіць у становішча, гуляць на чыімсьці полі. Вы павінны быць абсалютна незалежнымі, наколькі гэта магчыма, і аб’ектыўнымі. Задача — фарміраваць незалежнае ад астатніх інстытутаў улады меркаванне па ўсіх кірунках рэалізацыі дзяржаўнай палітыкі. Вы фарміруеце маё меркаванне. Чым больш пунктаў гледжання, тым хутчэй мы знойдзем аптымальнае рашэнне любых пытанняў. Прынцып: я начальнік — ты дурань, вам абсалютна не падыходзіць. Вы павінны калектыўна абмяркоўваць і прымаць рашэнні. А ў мяне на стале павінен быць аналітычны даклад з выразным вызначэннем „галоўнага ўдару“ і дзеянняў», — настроіў Аляксандр Лукашэнка кіраўніцтва Адміністрацыі Прэзідэнта. Ён заўважыў, што работа гэтых людзей — гэта «гарачая патэльня». Але гэта найважнейшая работа, паколькі ад яе залежыць не толькі дзейнасць Прэзідэнта, але і вырашэння стратэгічных для краіны пытанняў. І расслабляцца тут ні ў якім разе нельга. 

4. «Вы павінны быць пагружаныя ў жыццё рэгіёна. Вы павінны ведаць кожны куток рэгіёна і патрабаваць, патрабаваць, патрабаваць. Я павінен не проста ведаць, што, дзе, калі і чаму адбываецца, а бачыць усё вашымі вачыма — што там на месцы, як жывуць нашы людзі на месцах», — такую надзвчай важную, але, зразумела, вельмі складаную задачу кіраўнік дзяржавы паставіў перад сваімі памочнікамі-інспектарамі ў рэгіёнах. Ну, так ніхто і не абяцаў, што будзе лёгка.

5. «Калісьці ўсе хаваліся ад гэтага тэрміна. Але мною было ўведзена паняцце „ідэалогія“. Як бачыце, сёння ўсе загаварылі аб ідэалогіі, нават амерыканцы. Ад гэтага сыходзіць не трэба: ніхто нічога лепш не прыдумаў, як пазначыць працэс усялякіх пераўтварэнняў, мэт і гэтак далей у галаве чалавека, пакладзеных на паперу. Але „зямных“. Не так, як гэта было ў савецкія часы, — усе імкнуліся пабудаваць камунізм, але ніхто не ведаў, што гэта такое», — адзначыў Аляксандр Лукашэнка, кажучы пра ідэалагічную работу ў краіне. Па словах беларускага лідара, тут хапае праблем і бадай ці не самая вялікая з іх — фармалізм. Прэзідэнт акцэнтаваў увагу на тым, што ідэалогія — павінна ісці «ад зямлі». 

6. «На прыкладзе спецыяльнай ваеннай аперацыі мы ўсе бачым, з аднаго боку, эфектыўнасць прымянення беспілотнікаў, з другога — складанасць барацьбы з імі. Ударныя і разведвальныя комплексы развіваюцца вельмі дынамічна. Для кіравання імі выкарыстоўваюцца ўсё больш дасканалыя і абароненыя спосабы. Таму найважнейшая задача для нас — актыўнае развіццё сродкаў радыёэлектроннай барацьбы з беспілотнай авіяцыяй», — заявіў Галоўнакамандуючы падчас наведвання 927-га цэнтра падрыхтоўкі і прымянення беспілотных авіяцыйных комплексаў. Аляксандр Лукашэнка ўнікнуў ва ўсе аспекты гэтага пытання, адзначыўшы безумоўную важнасць беспілотных лятальных апаратаў. Але, папярэдзіў Прэзідэнт — галоўнае — не захапляцца, мець галаву на плячах, разумець, што нам трэба. 

Валерыя СЦЯЦКО

Фота: БелТА