Яшчэ зусім нядаўна здавалася, што зіма ўпэўнена трымае пазіцыі: моцныя маразы, надзейны лёд на вадаёмах, звыклыя зімовыя прагулкі і рыбалка. Але надвор’е мяняецца імкліва. Сёння тэмпература ўсё часцей падбіраецца да нуля, на паверхні лёду праступаюць цёмныя плямы, у расколінах з’яўляецца вада. Зіма паступова здае свае пазіцыі, і разам з гэтым лёд пачынае страчваць трываласць. Самае каварнае ў гэты перыяд тое, што вонкава ён можа выглядаць цалкам надзейным, але ўсярэдзіне ўжо становіцца рыхлым і небяспечным. Пра гэта паведамляе «Мінская Праўда».
Асабліва хутка лёд разбураецца каля берагоў. Там вада цяплейшая, цячэнне мацнейшае, а сонечныя прамяні хутчэй выграваюць паверхню. Небяспеку ўяўляюць і ўчасткі з хуткім цячэннем, вусці рэк, месцы над падземнымі ключамі. Выхад на такі лёд — гэта заўсёды рызыка, якая можа каштаваць жыцця.
Несуцяшальная статыстыка. З пачатку года ў краіне ўжо адбыліся трагічныя выпадкі: пад лёд праваліліся і патанулі тры чалавекі.
Калі ўсё ж адбылося самае страшнае і чалавек праваліўся пад лёд, галоўнае — захаваць самавалоданне. Паніка і рэзкія рухі толькі пагаршаюць сітуацыю.
- Неабходна стабілізаваць дыханне, раскінуць рукі і паспрабаваць зачапіцца за край лёду, імкнучыся прыняць гарызантальнае становішча.
- Асцярожна налягаючы грудзямі на край, трэба па чарзе закінуць ногі на паверхню.
- Калі лёд вытрымаў, трэба перакочвацца і павольна паўзці да берага, рухаючыся ў бок, адкуль прыйшлі, бо там лёд ужо быў правераны.
Няхай набліжэнне вясны будзе звязана толькі з радасным чаканнем цяпла, а не з трагічнымі навінамі.
