Вытворцы Кыргызстана ў асноўным рэалізуюць праз біржавую пляцоўку суравую бязь — баваўняную тканіну, якая прымяняецца для вытворчасці спецадзення, рабочых рукавіц, тэхнічных мяшкоў, мэблевых чахлоў і іншай падобнай прадукцыі. За мінулы год агульная сума здзелак па продажы суравой бязі з Кыргызстана на БУТБ дасягнула каля $1 млн, а за 4 месяцы 2026 года — $0,6 млн.

Такія лічбы агучыў прадстаўнік БУТБ у час сустрэчы беларускіх прадпрыемстваў-экспарцёраў з Надзвычайным і Паўнамоцным Паслом Кыргызстана ў Беларусі Эрболам Султанбаевым. Мерапрыемства адбылося 14 мая ў Мінску на базе Беларускай гандлёва-прамысловай палаты.

«У цэлым біржавы гандаль Беларусі і Кыргызстана характарызуецца высокай дадатнай дынамікай. У параўнанні са студзенем — красавіком мінулага года біржавы тавараабарот дзвюх краін вырас на 25 працэнтаў. З Беларусі на кыргызстанскі рынак пастаўлялася сухое малако, сметанковае масла, мяса буйной рагатай жывёлы і піламатэрыялы, у той час як па імпарце закуплялася толькі суравая бязь. Відавочна, што знешнегандлёвы патэнцыял нашых краін пакуль задзейнічаны не ў поўнай меры, таму для далейшага росту паказчыкаў узаемнага біржавога гандлю неабходна, па-першае, павялічыць пул кыргызстанскіх удзельнікаў таргоў, а па-другое, дапоўніць наменклатуру тавараў, уключаных у экспартна-імпартныя здзелкі, новымі перспектыўнымі пазіцыямі. Сумесная работа па вырашэнні гэтых пытанняў магла б стаць ключавым напрамкам супрацоўніцтва пасольства Кыргызстана і БУТБ», — падкрэслілі на біржы.

У 2026 годзе для ўдзелу ў біржавых таргах на БУТБ прыйшлі тры новыя рэзідэнты Кыргызстана, і цяпер на біржы акрэдытаваны 44 кампаніі з гэтай краіны.