Адметнасцю свята стала «Бітва Ганчароў» — шоу майстроў з усёй вобласці, якія будуць ствараць свае вырабы на вачах у публікі на сваіх ганчарных колах. На майстар-класах можна будзе паспрабаваць стварыць свой гліняны збан або гаршчок.

Гасцей запросяць у музей ганчара і на кірмаш, дзе прапануюць унікальныя работы поразаўскіх умельцаў, якія славяцца сваёй керамікай. Яе выраблялі тут на працягу стагоддзяў. Мясцовая чарнаглянцавая кераміка ўнесена ў Дзяржаўны спіс гісторыка-культурных каштоўнасцей Беларусі як элемент нематэрыяльнай культурнай спадчыны.

На пляцоўцы «Пад гармонік весялей» будзе жывая музыка і народныя танцы: тут пройдзе традыцыйная беларуская вечарына. Сваю вечарыну — пенную — арганізуюць для дзяцей.

А самай смачнай падзеяй дня стане дэгустацыя знакамітай поразаўскай банкухі — унікальнай мясцовай выпечкі, якая таксама ўнесена ў Дзяржаўны спіс гісторыка-культурных каштоўнасцяў Беларусі як элемент нематэрыяльнай спадчыны ў 2019 годзе.