Цана на нафту маркі Brent вырасла на гэтым тыдні на 17 працэнтаў, хоць у пятніцу, 6 сакавіка, ф’ючарсы апусціліся ніжэй за $85 за бараль. Гэта адбылося пасля таго, як прэзідэнт ЗША Дональд Трамп заявіў аб дзеяннях па зніжэнні цэнавага націску, а Міністэрства фінансаў ЗША выдала Індыі ліцэнзію на закупку на працягу месяца расійскай нафты, якая ўжо знаходзіцца ў танкерах у моры. Цана на нафту маркі WTI складала каля $80.

Ва ўмовах адсутнасці прыкмет аслаблення баявых дзеянняў на Блізкім Усходзе інвестыцыйная банкаўская і фінансавая кампанія Goldman Sachs Group Inc. звярнула ўвагу на рызыкі сцэнарыяў, пры якіх цана на нафту перавысіць $100 за бараль у выпадку прадаўжэння перабояў у пастаўках.

Bloomberg адзначае, што канфлікт на Блізкім Усходзе ўзрушыў нафтавыя рынкі. Практычна цалкам паралізаваным аказалася суднаходства праз Армузскі праліў, што перакрыла пастаўкі нафты на сусветныя рынкі і вымусіла вытворцаў пачаць скарачаць здабычу. Перспектыва зацяжнога канфлікту прадаўжае трымаць рынак у напружанні. 

Паводле даных Міжнароднага энергетычнага агенцтва, у мінулым годзе праз Армузскі праліў штодзённа праходзіла каля 20 млн бараляў нафты і нафтапрадуктаў. Даныя сачэння за суднамі, атрыманыя на гэтым тыдні, сведчаць аб рэзкім спадзе марскога трафіку праз гэту ключавую транспартную артэрыю.

«Дапусцім, яшчэ пяць тыдняў будуць назірацца вельмі малыя пастаўкі нафты праз праліў, — заявіла Саманта Дарт, сукіраўнік аддзела глабальных даследаванняў сыравінных тавараў у The Wall Street Lender. — Цалкам магчыма, што цэны на нафту маркі Brent перавысяць адзнаку $100 за бараль».

Міністр унутраных спраў ЗША Дуг Бёргам заявіў, што вашынгтонская адміністрацыя разглядае шэраг варыянтаў вырашэння праблемы рэзкага росту цэн на нафту і бензін. Разглядаюцца як меры, якія акажуць неадкладнае ўздзеянне, так і больш доўгатэрміновыя і складаныя крокі. Магчымыя рашэнні, у прыватнасці, уключаюць у сябе выкарыстанне запасаў нафты з надзвычайнага рэзерву краіны, магчыма, у каардынацыі з іншымі краінамі для дасягнення максімальнага эфекту. Аднак прадстаўнікі адміністрацыі пакуль не зрабілі крокаў для выкарыстання стратэгічнага нафтавага рэзерву.