За мінулы год у энергетычнай галіне краіны працаўладкавана звыш 1,2 тыс. выпускнікоў устаноў вышэйшай, сярэдняй спецыяльнай і прафесійна-тэхнічнай адукацыі, што на 205 чалавек больш, чым у 2023 годзе. Такія даныя былі агучаны на пасяджэнні калегіі Міністэрства энергетыкі па пытаннях маладзёжнай палітыкі, паведамляе БелТА.
«Ад таго, як работае наша галіна, у значнай ступені залежыць, як у цэлым функцыянуе эканоміка. Ўстойлівасць нашай работы цесна звязана з забяспечанасцю кадрамі. Нам важна работаць з людзьмі, у першую чаргу з моладдзю», — падкрэсліў міністр энергетыкі Дзяніс Мароз.
Разглядалася ўзаемадзеянне арганізацый з установамі адукацыі, практыка суправаджэння патэнцыйных энергетыкаў «са школьнай лавы», іх замацавання і падтрымкі на працоўных месцах. На дадзены момант у арганізацыях Мінэнерга працуюць больш за 11 тыс. спецыялістаў да 31 года.
Як адзначылі ў ведамстве, дзякуючы прафарыентацыйнай рабоце павялічылася колькасць заявак на мэтавае навучанне. У 2024 годзе іх колькасць вырасла ў 2,7 разы ў параўнанні з 2023 годам. У 2025 годзе на мэтавую падрыхтоўку адправяцца 292 маладых хлопцаў і дзяўчат. Адзначаны станоўчы вопыт па стварэнні інжынерных класаў у школах, ліцэях і гімназіях.
Разам з тым міністр энергетыкі пазначыў шэраг пытанняў, якія патрабуюць асаблівай увагі, і падкрэсліў: «Кожны кіраўнік нясе персанальную адказнасць за арганізацыю працы з моладдзю». Была адзначана высокая роля настаўніцтва і падтрымкі ў замацаванні маладых работнікаў на прадпрыемствах, неабходнасць практыка-арыентаванага падыходу ў функцыянаванні моладзевых саветаў і карысць прыцягнення моладзі да вырашэння вытворчых задач.
