Мужчына хацеў працягваць працаваць на ранейшых умовах, што і агучыў адміністрацыі прадпрыемства ў пісьмовай форме. Аднак не атрымаў згоды наймальніка, які ў апошні дзень працы зарабіў яшчэ і дысцыплінарнае спагнанне за адмову выканаць даручэнне кіраўніцтва. Да вырашэння працоўнай спрэчкі падключыўся прафсаюз.
— Прававой інспекцыяй працы галіновага прафсаюза былі вывучаны ўсе неабходныя дакументы. Калектыўным дагаворам арганізацыі прадугледжана гарантыя на прадаўжэнне працоўных адносін з добрасумленнымі работнікамі. Безумоўна, гэтая норма абавязковая да выканання. Важна падкрэсліць і тое, што нягледзячы на наяўныя пытанні да работніка з боку кіраўніцтва, да дысцыплінарнай адказнасці ён не прыцягваўся да моманту атрымання апавяшчэння аб спыненні працоўных адносін, — адзначыў галоўны прававы інспектар працы Беларускага прафсаюза працаўнікоў гандлю, спажывецкай кааперацыі і прадпрымальніцтва Андрэй Кошар.
Урэгуляваць працоўную спрэчку ў дасудовым парадку не ўдалося. Кропку ў гэтай справе паставіў суд. Прафсаюз дапамог работніку падрыхтаваць працэсуальныя дакументы і прадстаўляў ягоныя інтарэсы ў судзе. Вынік — прынята рашэнне аднавіць работніка на ранейшай пасадзе і на тых жа ўмовах, адмяніць дысцыплінарнае спагнанне ў выглядзе вымовы, спагнаць з арганізацыі на карысць работніка сярэдні заробак за час вымушанага прагулу, які доўжыўся каля трох месяцаў, а таксама персанальную надбаўку і прэмію.
Акрамя таго, наймальнік кампенсаваў мужчыну і маральную шкоду. У агульнай суме работніку выплачана больш за 12 тысяч рублёў.
Трэба адзначыць, што пытанні падаўжэння працоўных адносін у практыцы юрыстаў ФПБ сустракаюцца даволі часта. Напрыклад, работнікаў цікавіць, ці можа наймальнік у аднабаковым парадку звольніць супрацоўніка па заканчэнні тэрміна дзеяння кантракту? Ці абавязаны наймальнік заключыць з работнікам новую дамову, калі не было спагнанняў? На гэтыя і іншыя пытанні прафсаюзныя юрысты рэгулярна адказваюць як на выязных і асабістых прыёмах, гэтак і кансультуюць па тэлефоне.
Нагадаем, звярнуцца з пытаннем, звязаным з працоўнымі адносінамі, можна і ў Міжгаліновы маніторынгавы цэнтр ФПБ. Прафсаюзныя спецыялісты працуюць штодня з 8.00 да 20.00 — 8 801 100 1111.
Алена КРАВЕЦ
