Больш за палову зваротаў датычылася недахопу электрычных зарадных станцый (ЭЗС) як у абласных і раённых цэнтрах, так і ўздоўж трас рэспубліканскага значэння. Скардзіліся людзі на недахоп ЭЗС уздоўж турыстычных маршрутаў (Нарач, Браслаўшчына). На недастатковасць зараднай інфраструктуры паказвае і праведзенае на тэлеграм-канале КДК апытанне. Па яго выніках 48 % рэспандэнтаў выказаліся аб дэфіцыце ЭЗС. 

Траціна грамадзян, якія звярнуліся на гарачую лінію, расказалі аб няякасных паслугах па зарадцы электрамабіляў. Адно з актуальных пытанняў — непрацуючыя станцыі. Пры гэтым асобныя з іх не функцыянуюць працяглы час (месяц і больш). Ёсць прэтэнзіі да недастатковага функцыянала дадаткаў, антысанітарыі на парковачных месцах для зарадкі. 

Некалькі зваротаў былі звязаны з устаноўкай магутных зарадных станцый у дварах жылых дамоў. Гэта стварае сур’ёзныя нязручнасці для жыхароў спальных раёнаў у выглядзе пастаяннага патоку транспарту, шуму ад станцый, святла фар у начны час, бруду і гэтак далей. Адной з прапаноў у дадзенай сітуацыі можа стаць устаноўка ў спальных раёнах выключна павольных станцый, якія не ствараюць шуму і пастаяннага трафіку аўтамабіляў. 

На гарачую лінію патэлефанавалі некалькі прадстаўнікоў кампаній, якія ўстанаўліваюць ЭЗС. Сутнасць зваротаў — працягласць і непразрыстасць узгаднення і атрымання дазвольнай дакументацыі для новых аб’ектаў. 

Абагульненыя матэрыялы будуць накіраваны зацікаўленым ведамствам і арганізацыям для прыняцця неабходных мер рэагавання. Паведамленні, якія паступілі, застаюцца на кантролі.