Па словах прадстаўніка прадпрыемства, даступнасць медыкаментаў з’яўляецца неабходнай умовай забеспячэння насельніцтва своечасовай медыцынскай дапамогай.

— Дзяржава забяспечвае такую даступнасць шляхам найбольш поўнага насычэння ўнутранага рынку краіны бяспечнымі, эфектыўнымі і якаснымі лекавымі прэпаратамі, — адзначыў А. Кірылюк. — Перш за ўсё тымі, якія ўключаны ў Рэспубліканскі фармуляр лекавых сродкаў і пералік асноўных лекавых сродкаў. Дзякуючы ім у нас будуюцца ў прынцыпе ўсе клінічныя пратаколы, якія выкарыстоўваюцца ў медыцынскіх працэдурах для лячэння, прафілактыкі і рэабілітацыі.

Спецыяліст заўважыў, што асартымент прадукцыі ў «Белфармацыі» і на іншых абласных прадпрыемствах дзяржаўнай сістэмы фармацыі ўключае больш за 7,5 тыс. найменняў прадукцыі. З іх 4,5 тыс. — гэта лекавыя прэпараты, у тым ліку 1,6 тыс. — айчыннай вытворчасці. Усяго ў рэспубліцы працуе 3 961 аптэка. Пры гэтым структура рынку выглядае наступным чынам: 1 865 аптэк — дзяржаўныя (47% ад агульнай колькасці) і 2 096 — камерцыйныя (53 %).

— Дзяржаўны сацыяльны стандарт забяспечанасці аптэкамі ўсіх формаў уласнасці, устаноўлены Саветам Міністраў, істотна перавыкананы, — звярнуў увагу А. Кірылюк. — У цэлым па рэспубліцы — больш чым у тры разы, а ў Мінску — у пяць разоў.

Таксама прадстаўнік «Белфармацыі» падкрэсліў, што ўдасканаленне сістэмы рэалізацыі лекаў непарыўна звязана з развіццём ІТ-тэхналогій. У практыку актыўна ўкараняюцца зручныя для мінчан і жыхароў рэгіёнаў механізмы. У іх ліку сістэма «электронны рэцэпт», інтэрнэт-гандаль і праграмы лаяльнасці па картах медыцынскага абслугоўвання.

Асаблівая ўвага прадпрыемства надае мадэрнізацыі саміх аб’ектаў і павышэнню кваліфікацыі супрацоўнікаў.

— Аптэкі прадпрыемства валодаюць сучаснымі матэрыяльна-тэхнічнымі базамі, якія часткова або цалкам аўтаматызаваныя, — удакладніў А. Кірылюк. — Гэта дазваляе палепшыць і паскорыць работу нашых аптэк, у тым ліку і работу спецыялістаў, каб яны аказвалі сучасную і больш якасную фармацэўтычную дапамогу і фармацэўтычнае кансультаванне кожнага спажыўца.

А. Кірылюк дадаў, што асноўнымі напрамкамі дзейнасці прадпрыемства застаюцца строгае падтрыманне сістэмы кантролю якасці, стварэнне адзінай інфармацыйнай прасторы з усімі арганізацыямі аховы здароўя і бесперапыннае навучанне кадраў, у тым ліку з дапамогай дыстанцыйных тэхналогій.

— Цяпер «Белфармацыя» захоўвае статус вядучай дзяржаўнай аптэчнай арганізацыі Беларусі, у якую ўваходзяць 240 аптэк, з іх 16 — кругласутачныя, — растлумачыў ён. — Рознічная сетка аптэк прадпрыемства размешчана ў Мінску і ў Мінскім раёне. Маецца ўласная інтэрнэт-аптэка. Аптэчны склад прадпрыемства займае плошчу больш за 20 тыс. кв. м і з’яўляецца найбуйнейшым у краіне. Акрамя таго, у нас ёсць уласная кантрольна-аналітычная лабараторыя, якая гарантуе кантроль якасці прадукцыі, што паступае. Арганізавана адзіная даведачная служба. Атрымаць інфармацыю аб наяўнасці лекаў і рэжыме работы можна па кароткім нумары 169.