Экспазіцыя прымеркавана да Года беларускай жанчыны і прадстаўляе больш за 30 работ, створаных у 2025-2026 гадах. Гледачы ўпершыню ўбачаць палотны з новай серыі «Чырвонае сонца», а таксама знакамітыя творы з цыкла «Восень. Зямля і людзі», адзначаныя бронзавым медалём Акадэміі мастацтваў СССР. У экспазіцыі прадстаўлены каляровыя лінагравюры, афорты, літаграфіі і работы ў змешанай тэхніцы.

Для многіх наведвальнікаў творчасць Ларысы Журавовіч асацыюецца з рэалістычнымі нацюрмортамі і пейзажамі. Аднак у новым праекце мастачка раскрываецца з нечаканага боку, вяртаючыся пасля доўгага перапынку да сваёй першай любві — эстампа і друкаванай графікі. Сакрэты гэтага складанага мастацтва яна спасцігала ў народных мастакоў Беларусі Васіля Шаранговіча і Георгія Паплаўскага, а таксама ў Генадзя Грака.

«Можна маляваць усё жыццё хлеб і сала, і гэта будзе добра, будзе падабацца ўсім. Але нешта ўнутры мастака штурхае да новых задач, да новай мовы», — падзялілася Ларыса Журавовіч.

Паводле слоў аўтара, серыя «Чырвонае сонца» прысвечана жанчынам — маці, працаўніцам, захавальніцам культуры. Праз традыцыйныя народныя колеры мастачка стварыла моцныя вобразы, якія ўвасабляюць чысціню, урадлівасць і само жыццё.

Рэалізацыя праекта запатрабавала не толькі творчых, але і тэхнічных намаганняў. Паколькі ў Бялынічах, дзе жыве мастачка, адсутнічала неабходнае абсталяванне, друкарскі станок для гравюр зрабіў яе муж Вячаслаў.

Дырэктар Магілёўскага абласнога краязнаўчага музея імя Раманава Яўген Белавусаў адзначыў, што Ларыса Журавовіч — даўні сябар установы і гонар Магілёўскай вобласці. «Сёння мы бачым зусім новую Ларысу Віктараўну з новай тэхнікай. Гэта новы падыход у яе рабоце, і я думаю, усім нам будзе вельмі цікава ўбачыць гэтыя цудоўныя творы», — сказаў ён.