Мерапрыемства аб’яднала больш за 350 прадстаўнікоў студатрадаўскага руху ўсіх гарадоў і раёнаў Брэсцкай вобласці. Падчас цырымоніі таксама былі ўручаны працоўныя пуцёўкі.

— Сёлета мы ставім перад сабой задачу максімум: значна павялічыць колькасць маладых людзей, якія былі задзейнічаныя ў студэнцкіх атрадах. Працаўладкоўваем маладых людзей па сямі профілях. Ёсць і «фішачкі». У нас сёлета прыступіў да працы сэрвісны атрад, прадстаўнікі якога праводзяць экскурсіі ў Брэсцкай крэпасці. Сэрвісныя атрады працуюць у Белавежскай пушчы, на чыгунцы. Сельскагаспадарчыя атрады, як заўсёды, будуць дапамагаць аграрыям падчас уборачнай кампаніі, — расказала першы сакратар Брэсцкага абласнога камітэта БРСМ Лізавета Чамармазовіч.

У Брэсцкай вобласці сёлета каля 8 тысяч чалавек плануюць працаўладкаваць у студатрадах: у будаўнічых, сельскагаспадарчых, педагагічных, сэрвісных, экалагічных, медыцынскіх і вытворчых. Юнакоў і дзяўчат гатовыя прыняць на працу больш за 300 прадпрыемстваў і арганізацый.

— Студатрад — гэта не проста падпрацоўка, — падкрэсліла камандзір педагагічнага атрада «Маяк юнацтва» імя Героя Савецкага Саюза Марата Казея Надзея Варанчак. — Цікава тым, што ёсць магчымасць і зарабіць, і адпачыць у коле аднагодкаў. Студатрадаўскі рух адкрывае шмат магчымасцяў: афіцыйнае працаўладкаванне, досвед працы ў камандзе, новыя знаёмствы, падарожжы па Беларусі. Натуральна, гэта спосаб крута правесці лета. 

Сёлета студатрадаўцы будуць працаваць на чыгунцы, у летніх аздараўленчых лагерах, дапамагаць у будаўніцтве патрыятычнага цэнтра ў Брэсцкай крэпасці і аўтамабільнага моста праз раку Прыпяць паміж Столінскім і Лунінецкім раёнамі.

Падчас адкрыцця трэцяга працоўнага семестра адбылася патрыятычная акцыя «Беларусь памятае. Памятаем кожнага». Маладыя людзі ўшанавалі памяць абаронцаў Айчыны. Таксама сёння ў праграме — прагляд фільма «Адно на дваіх» пра жыццё і подзвіг лётчыкаў-герояў Андрэя Нічыпорчыка і Мікіты Куканенкі.

Студатрадаўскі рух у Беларусі працягвае набіраць абароты: у 2025 годзе ён аб’яднаў больш за 64 тысяч маладых людзей і ў гэтым сезоне планку зніжаць не плануе. БРСМ — асноўны аператар маладзёжнага працаўладкавання. Арганізацыя выступае сувязным звяном паміж моладдзю, працадаўцамі і органамі занятасці, забяспечваючы не толькі пошук вакансій, але і прававую падтрымку.

Дарэчы, статыстыка гэтага года пацвярджае высокую цікавасць моладзі да працы: на 1 мая 2026 года ў краіне ўжо адпрацавалі і працягваюць працаваць 387 атрадаў агульнай колькасцю больш за 5 тысяч чалавек, з якіх больш за 2 тысячы — падлеткі да 18 гадоў. Праца ў студатрадах дае маладым людзям шэраг бясспрэчных пераваг. Гэта атрыманне першай працоўнай прафесіі і павышэнне канкурэнтаздольнасці на рынку працы, фінансавая незалежнасць, магчымасць падарожнічаць па краіне і развіваць лідэрскія якасці. Акрамя гэтага, байцы студэнцкіх атрадаў маюць падатковыя льготы, могуць праходзіць бясплатную медыцынскую камісію пры залічэнні на працу, маюць гарантаваную мінімальную заработную плату, а таксама ўсе гарантыі пры працаўладкаванні і працы. 

Студатрадаўскі рух у Беларусі — маштабная ініцыятыва, якая дапамагае вырашыць пытанні працаўладкавання моладзі. Шырокая геаграфія праектаў, уключаючы міжнароднае супрацоўніцтва, і разнастайнасць профіляў дзейнасці дазваляюць кожнаму маладому чалавеку знайсці сваё пакліканне, унесці асабісты ўклад у развіццё краіны і атрымаць бясцэнны вопыт, які стане надзейным падмуркам для будучай кар’еры.

Данііл ХМЯЛЬНІЦКІ
Фота БелТА