«Вынікам добрай прапрацоўкі і рэалізацыі прадуктаў і паслуг у сферы экалагічнага турызму з’яўляецца вялікая зацікаўленасць з боку турыстаў і гасцей нашага рэгіёна. За мінулы перыяд 2025 года аб’екты на асабліва ахоўных прыродных тэрыторыях Нацыянальнага парку «Браслаўскія азёры» наведала больш за 31 тыс. чалавек», — падзялілася вынікамі Надзея Дударонак.

Паводле яе слоў, госці скарысталіся паслугамі пражывання на базах адпачынку, турыстычнымі стаянкамі, пракатам спартыўнага і турыстычнага інвентару, індывідуальнымі карпаратыўнымі турамі, наведалі назіральныя вышкі на гары Маяк, вальеры з жывёламі, здзейснілі пешыя і водныя прагулкі, экскурсіі.

Надзея Дударонак адзначыла, што экалагічную сцежку «Гара Маяк» з аднайменнай назіральнай вышкай за перыяд студзеня-ліпеня 2025 года наведалі ўжо больш за 16 тыс. чалавек.

«У летні сезон асабліва запатрабаваная сетка турыстычных стаянак. Яна патрабуе асаблівай увагі і падтрымання інфраструктуры. Турыстычная стаянка ўяўляе сабой альтанку, абсталяванае вогнішча, падыход да возера, смеццязборнікі, прыбіральні. На іх абавязкова размешчана інфармацыя пра важнасць захавання навакольнага асяроддзя, недапушчальнасць выкарыстання мыйных хімічных сродкаў у азёрах, правілах знаходжання. За перыяд май-ліпень 2025 года на стаянках адпачывала прыкладна 13 тысяч чалавек», — расказала начальніца аддзела турызму. 

Намеснік дырэктара - начальнік аддзела планавання і арганізацыі турыстычнай дзейнасці Дэпартамента па турызме Міністэрства спорту і турызму Кацярына Ганчаронак расказала, што ў Нацыянальным агенцтве па турызме можна прайсці атэстацыю экскурсаводаў і гідаў-перакладчыкаў па экалагічнай тэматыцы. Па стане на 2024 год падрыхтаваны ўжо 31 спецыяліст, які мае магчымасць праводзіць экскурсіі.

Кіраўнік праекта «Развіццё экалагічнага турызму для садзейнічання зялёнаму пераходу да інклюзіўнага і ўстойлівага росту» Кірыл Сцежкін расказаў, што праект рэалізуецца Міністэрствам прыродных рэсурсаў і аховы навакольнага асяроддзя Беларусі сумесна з Праграмай развіцця ААН пры фінансавай падтрымцы Расіі. Пілотнымі пляцоўкамі для рэалізацыі праекта сталі заказнікі «Налібоцкі», «Чырвоны Бор», «Азёры», «Асвейскі».

Сярод асноўных задач пры падрыхтоўцы праекта былі павышэнне ўзроўню інфармаванасці і дасведчанасці ў сферы экалагічнага турызму, стварэнне неабходнай метадычнай базы і ўмацаванне інфраструктуры пілотных пляцовак.

«Больш за 3 тыс. чалавек павысілі веды і кампетэнцыі ў галіне экатурызму, падрыхтаваны пяць сертыфікаваных экскурсаводаў, вакол пілотных заказнікаў сфарміраваны чатыры экатурыстычныя кластары, якія аб’ядналі мясцовыя супольнасці, бізнес і культурныя ўстановы. Укаранёны таксама два нацыянальныя стандарты для сертыфікацыі экатурыстычных прадуктаў і для адзінага стылю ўсіх асабліва ахоўных прыродных тэрыторый. Істотна палепшылася інфраструктура: новыя экасцежкі, візіт-цэнтры, сучаснае абсталяванне, глэмпінгі, развіццё воднага і чыгуначнага экалагічнага турызму. У сельскай мясцовасці створана 12 новых працоўных месцаў. Актыўна развіваецца прасоўванне праз віртуальныя туры, таксама былі створаны інтэрактыўная карта і цэлы шэраг новых турпрадуктаў. Было створана чатыры клубы юных эколагаў, што асабліва важна для выхавання будучых абаронцаў прыроды», — падзяліўся вынікамі Кірыл Сцежкін.

Ён адзначыў, што ў параўнанні з 2021 годам колькасць турыстаў на пілотных тэрыторыях заказнікаў вырасла больш чым у паўтара раза.

У III Міжнароднай спецыялізаванай экалагічнай выставе Ecology Expo, якая праходзіць з 19 па 21 жніўня, прымаюць удзел прадстаўнікі рэспубліканскіх органаў дзяржаўнага кіравання, міністэрстваў і ведамстваў з краін блізкага і далёкага замежжа, беларускіх і замежных прадпрыемстваў і міжнародных арганізацый, навукоўцы. Яны абмяркоўваюць ключавыя пытанні развіцця зялёнай эканомікі, абменьваюцца перадавым вопытам і дэманструюць дасягненні ў галіне аховы навакольнага асяроддзя.