«Усебеларускі народны сход, безумоўна, замацуе беспрэцэдэнтную медыяактыўнасць апошніх тыдняў па беларускай тэматыцы. Серыя міжнародных візітаў і сустрэч высокага ўзроўню, рэзананснае інтэрв’ю Прэзідэнта амерыканскаму тэлеканалу Newsmax, будучае пасланне кіраўніка нашай дзяржавы беларускаму народу і абмеркаванне праекта пяцігадовай Праграмы сацыяльна-эканамічнага развіцця трымаюць Беларусь у топе навін», — канстатаваў Андрэй Кунцэвіч.

Першы намеснік міністра інфармацыі таксама адзначыў, што для работы непасрэдна ў Палацы Рэспублікі ў дні УНС акрэдытавана больш за 400 прадстаўнікоў айчыннай і замежнай прэсы, у тым ліку журналісты з вядучых СМІ Расіі, Кітая, Турцыі, Германіі. «Сем найбуйнейшых беларускіх медыя арганізавалі ў Палацы свае перасоўныя студыі, запланаваныя прамыя ўключэнні з месца падзеі», — дапоўніў Андрэй Кунцэвіч.

«Улічваючы вялікую цікавасць да Усебеларускага народнага сходу з боку прэсы, арганізатарам прыйшлося нарошчваць колькасць працоўных месцаў для журналістаў у прэс-цэнтры УНС. Дарэчы, прадстаўнікі СМІ будуць там забяспечаны ўсім неабходным для камфортнай работы», — сказаў на заканчэнне першы намеснік міністра інфармацыі.