Брэсцкія мытнікі спынілі дзве незаконныя схемы вывазу тавараў коштам звыш Br200 тыс. Першапачаткова яны ўвозіліся ў Беларусь пад маркай тавараў для асабістага карыстання, затым іх планавалі рэалізаваць у Расіі. Пра гэта БелТА паведамілі ў Дзяржаўным мытным камітэце.
У першым выпадку праваахоўнікі Брэсцкай мытні спынілі для праверкі мікрааўтобус Iveco пад кіраваннем 40-гадовага індывідуальнага прадпрымальніка. Ён ехаў з Брэста ў Расію. Пры аглядзе аўто былі выяўлены мыйкі высокага ціску, пыласосы, дзіцячыя каляскі і крэслы, газавыя і вугальныя грылі, электрачайнікі і розны посуд. Усяго больш за 110 адзінак тавараў, вырабленых у краінах Еўрапейскага Саюза, агульным коштам больш за Br170 тыс.
Аналагічны выпадак зафіксаваны з расійскім перавозчыкам. Параачышчальнікі, пыласосы і мыйкі высокага ціску ў колькасці 24 адзінак і коштам больш за Br35 тыс. вывозілі ў Расію ў паўпрычэпе грузавіка Mercedes.
Было ўстаноўлена, што ў двух выпадках тавары ўвозіліся на тэрыторыю ЕАЭС рознымі фізічнымі асобамі як асобныя адзінкі тавараў для асабістага карыстання. Такім чынам прадпрымальныя «камерсанты» вырашылі пазбегнуць выплаты мытных плацяжоў у выпадку законнага ўвозу праз мытную мяжу камерцыйных партый тавараў.
Брэсцкай мытняй распачаты адміністрацыйныя працэсы ў адпаведнасці з ч. 2 арт. 15.1 КаАП Беларусі. Санкцыяй артыкула для фізічных асоб прадугледжаны штраф да 30 базавых велічынь, для індывідуальных прадпрымальнікаў — да 100 базавых велічынь, а для юрыдычных асоб — да 500 базавых велічынь з магчымай канфіскацыяй тавараў і транспартных сродкаў, якія выкарыстоўваюцца для іх перамяшчэння.
Незаконна ўвезеныя тавары канфіскаваны да рашэння суда.
