З’езд Беларускага рэспубліканскага саюза моладзі прайшоў у Доме моладзі 24 верасня. Яго прымеркавалі да 105-годдзя Ленінскага Камуністычнага саюза моладзі Беларусі, перадае агенцтва «Мінск-Навіны».
На парадку дня — падвядзенне вынікаў работы БРСМ за апошнія пяць гадоў, вызначэнне перспектыў развіцця арганізацыі да 2030 года, а таксама абранне новага складу Цэнтральнага Камітэта.
— Беларускі рэспубліканскі саюз моладзі — гэта правапераемнік ЛКСМБ. І важна, што наша маладзёжная арганізацыя захоўвае лепшыя традыцыі яшчэ з савецкіх часоў, — адзначыў да пачатку з’езда першы сакратар Цэнтральнага камітэта БРСМ Аляксандр Лук’янаў.
Як падкрэсліў суразмоўца, у краіне выбудаваная не толькі сістэма бесперапыннай адукацыі, але і выхавання моладзі, будучых грамадзян, — ад піянерскай арганізацыі да БРСМ, грамадскіх структур.
— За апошнія пяць гадоў праведзена сур’ёзная праца. У грамадска-палітычнай плоскасці краіны адбылася вялікая колькасць пераўтварэнняў: абмеркаванне праекта Канстытуцыі, УНС, рэферэндум, адзіны дзень галасавання. Акрамя таго, адзначана рэкордная яўка моладзі на выбарах Прэзідэнта Рэспублікі Беларусь. Гэта сведчыць аб тым, што наша грамадская арганізацыя і грамадска-палітычнае поле ў цэлым актыўна дапамагае нашым грамадзянам пастаянна знаходзіцца ва ўзаемадзеянні з дзяржавай. Фактычна, сёння сфарміраваны інстытут прамога ўплыву на важныя грамадска-палітычныя пытанні, — падкрэсліў А. Лук’янаў.
— Як ніколі актыўна працуе сістэма кадравага патэнцыялу, і мы разлічваем, што ў будучыні нашы маладыя актывісты, валанцёры, байцы студатрадаў, хлопцы і дзяўчаты, якія прадстаўляюць навуку, і далей будуць папаўняць дзяржаўныя кадры, як гэта адбываецца і сёння.
Нельга не адзначыць і ўклад студэнцкіх атрадаў у развіццё краіны. Хлопцы і дзяўчаты сваёй працай умацоўваюць Беларусь, удзельнічаюць ва ўзвядзенні знакавых аб’ектаў. Байцы праявілі сябе на будаўнічых пляцоўках у Хатыні, Брэсцкай крэпасці, Астраўцы. Зараз моладзь ударна працуе на месцах узвядзення Нацыянальнага гістарычнага музея і парку Народнага адзінства.
Сёння актывістамі БРСМ з’яўляюцца больш за 434 тыс. маладых людзей, у краіне створана каля 9,8 тыс. пярвічных арганізацый. За апошнія 5 гадоў у складзе студэнцкіх атрадаў папрацавала больш за 209 тыс. чалавек, а валанцёрскі рух аб’яднаў больш за 39 тыс. юнакоў і дзяўчат.
Фота Сяргея Пожагі
