Ён растлумачыў, што такім чынам можна знізіць узровень небяспекі, якая ўзнікае для дзяцей у дні летніх канікул. Непаўналетнія, прадстаўленыя летам самі сабе, могуць і ўчыняць злачынствы, і атрымліваць сур’ёзныя траўмы пры розных абставінах.

Напрыклад, не так даўно ў Магілёве група падлеткаў зайшла ў непрацуючы спарткомплекс, дзе былі аголеныя правады. Адзін з дзяцей дакрануўся да іх. Аказалася, што правады пад напружаннем, у выніку падлетак атрымаў траўмы і быў шпіталізаваны.

Дземідовіч падкрэсліў, што нярэдка падлеткі атрымліваюць траўмы пасля распівання алкаголю.

«Цяпер падлеткі ўсё часцей распіваюць алкаголь ужо не ў грамадскіх месцах, а на „флэтах“ і „ўпісках“. Бацькі, нічога не падазраючы, адпраўляюць дзіця да сябра, альбо да сяброўкі, пераначаваць, а насамрэч яны ўсю ноч куражацца на кватэрах, дзе ўжываюць алкаголь і наркотыкі», — сказаў прадстаўнік МУС.

Часам гэта заканчваецца трагедыямі: напрыклад, падзеннямі з вокнаў. Дземідовіч дадаў, што сёлета ІСН ужо выявіла больш за 250 дзяцей, якія ўдзельнічалі ў 165 п’яных вечарынках. Пры гэтым разам з імі спіртное распівалі больш за 100 дарослых.

Што да наркотыкаў, то сёлета не было выпадкаў перадазіровак у непаўналетніх. У 2024 годзе за такі ж перыяд было зафіксавана шэсць фактаў, калі дзяцей дастаўлялі ў бальніцы з «перадозамі». Усе выпадкі здарыліся ў Мінску.

Цяпер асаблівая ўвага будзе ўдзелена правядзенню выпускных вечароў. Галоўная задача МУС — гарантаваць бяспеку як гасцей мерапрыемства, так і саміх выпускнікоў.

У сваю чаргу старшы пракурор па асобых даручэннях упраўлення Генпракуратуры па наглядзе за выкананнем заканадаўства аб непаўналетніх і моладзі Раман Сідарэнка паведаміў, што з пачатку года загінулі ўжо 44 дзіцяці, тады як летась за гэты ж час — 42.

У тым ліку сёлета было 13 суіцыдаў, 10 смерцяў пры ДТЗ, а таксама чатыры ўтапленні і падзенні з вышыні. Тры дзіцяці загінулі на пажарах. Што да самагубстваў, то да іх, па словах пракурора, прыводзяць складаныя адносіны з бацькамі і з іншымі дзецьмі ў школах.

Сярод прычын трагедый таксама — неасцярожнасць і бестурботнасць, небяспечныя паводзіны ў інтэрнэце. Застаецца актуальнай і праблема выпадзення дзяцей з вокнаў. 

Акрамя таго, дзеці гінуць на вадаёмах, у тым ліку таму, што ходзяць на рыбалку або купаюцца без дарослых, часта — у забароненых месцах. Як зазначаюць у пракуратуры, бацькі павінны сістэматычна нагадваць дзецям аб правілах бяспекі на вадаёмах.