Бясплатныя кансультацыі для малазабяспечаных грамадзян правядуць адвакаты ўсіх тэрытарыяльных калегій 2 ліпеня з нагоды Дня Незалежнасці Рэспублікі Беларусь, паведаміла БелТА прэс-сакратар Беларускай рэспубліканскай калегіі адвакатаў Ірына Рэут.
Акцыя пройдзе ў першай палове дня ў форме вусных кансультацый па пытаннях, якія не звязаны з прадпрымальніцкай дзейнасцю і не патрабуюць азнаямлення з дакументамі. Падрабязная інфармацыя аб правядзенні акцыі ў кожным рэгіёне будзе размяшчацца на сайтах і ў сацыяльных сетках тэрытарыяльных калегій адвакатаў.
Бясплатныя кансультацыі для малазабяспечаных грамадзян сёлета адвакаты краіны таксама правядуць 17 верасня — з нагоды Дня народнага адзінства, 1 кастрычніка — Дня пажылых людзей, 14 кастрычніка — Дня маці, 21 кастрычніка — Дня бацькі, 4 снежня — з нагоды Дня юрыста.
