Паводле слоў Юрыя Чабатара, у аснову дакумента ляглі фундаментальныя прынцыпы і стратэгічныя арыенціры, якія пазначаны кіраўніком дзяржавы, вынікі аналітычных даследаванняў і сацапытанняў беларусаў, запыты грамадства. Праграма-2030 з’яўляецца сістэмным дакументам, у якім выбудаваны дакладны алгарытм дасягнення галоўнай мэты пяцігодкі — новай якасці жыцця беларусаў.

Для эфектыўнага адказу на знешнія і ўнутраныя выклікі створана цэласная архітэктура сярэднетэрміновых праграм: 20 дзяржаўных (ключавы інструмент бюджэтнага фінансавання сацыяльных абавязацельстваў), 17 галіновых (механізм прыцягнення камерцыйнага капіталу для вырашэння спецыялізаваных задач), 7 рэгіянальных і 38 навуковых праграм (фарміруюць падмурак устойлівага развіцця).

На чале гэтай піраміды — праграма-2030, якая каскадзіруецца праз комплекс праграмных дакументаў, забяспечваючы дасягненне пастаўленых задач і рэалізацыю прыярытэтаў. «Яе аснова — сем ключавых прыярытэтаў: нацыянальная дэмаграфічная бяспека — захаванне насельніцтва, умацаванне здароўя нацыі і падтрымка сям’і; развіццё чалавечага патэнцыялу, якасная адукацыя, выхаванне гарманічнай і патрыятычнай асобы; стварэнне якаснага і зручнага асяроддзя для жыцця; рост канкурэнтаздольнасці, паскарэнне тэхналагічнага развіцця і лічбавая трансфармацыя; моцныя рэгіёны; умацаванне абараназдольнасці дзяржавы і развіццё абароннага сектара эканомікі; рэалізацыя турыстычнага патэнцыялу», — расказаў Юрый Чабатар.

Кожны прыярытэт напоўнены канкрэтнымі задачамі. Яны ў сваю чаргу алічбаваныя праз сістэму якасных індыкатараў для ацэнкі выніковасці — іх каля 70.

«Такім чынам, праграма становіцца канкрэтнай, кампактнай, народнай, гэта значыць даступнай і зразумелай кожнаму грамадзяніну», — падкрэсліў Юрый Чабатар.