Старшыня Беларускай федэрацыі хакея на траве Аляксандр Грачоў разлічвае на максімальнае прадстаўніцтва беларускіх каманд на пастаменце міжнароднага турніру «Кубак наймацнейшых спартсменаў», паведамляе БелТА.
Матчы Кубка наймацнейшых спартсменаў адбудуцца ў Мінску з 22 па 27 ліпеня, у мужчынскім і жаночым турнірах выступяць па пяць каманд. У лік удзельнікаў увайшлі нацыянальныя зборныя Беларусі і Расіі, маладзёжныя склады абедзвюх краін, а таксама мужчынская і жаночая каманды Узбекістана. Спаборніцтвы пройдуць у кругавым фармаце — усе зборныя згуляюць па разе з кожным з сапернікаў.
У маі гэтага года жаночая зборная Беларусі праводзіла вучэбна-трэніровачны збор у Кітаі. Выступленне мясцовых каманд у Кубку наймацнейшых таксама разглядалася, але з-за шчыльнага графіка кітайскія хакеісты засталіся па-за колькасцю ўдзельнікаў. «Справа ў тым, што ўнутраны каляндар у Кітаі складзены на год наперад, і наш старт ужо не мог туды ўвайсці. Затое ўжо ёсць дамоўленасць на наступны Кубак, а таксама ў верасні 2026 года мы чакаем каманду правінцыі Цзянсу на новы турнір у Беларусі. У цэлым у нас завязаліся добрыя адносіны з кітайскім бокам, у кастрычніку зноў паедзем туды на зборы і згуляем некалькі таварыскіх матчаў», — сказаў старшыня федэрацыі.«Будучы старт — галоўны ў сезоне. Нацыянальны чэмпіянат — гэта добра, але міжнародны турнір — ужо зусім іншы спаборніцкі вопыт. Гэта магчымасць стварыць умовы для чальцоў нацыянальнай каманды, каб яны не гублялі кандыцыі, а таксама дадатковая гульнявая практыка ва ўмовах санкцый. Ставім максімальныя задачы ўсім нашым камандам: чакаем перамог ад нацыянальных зборных і прызавых месцаў ад маладзёжных, — адзначыў Аляксандр Грачоў. — Будзе цікава паглядзець на хакеістаў Узбекістана, у іх добрая мужчынская зборная. Узровень дзяўчат ніжэйшы, яны толькі пачынаюць інтэнсіўнае развіццё. Плануем пашырыць колькасць удзельнікаў у наступным годзе: запрашэнне ўжо атрымала Інданезія, спадзяемся на дэбют Казахстана».
Фота з адкрытых крыніцПершыя матчы на дамашнім турніры нацыянальныя зборныя Беларусі правядуць 22 ліпеня супраць маладзёжных каманд Расіі. Паядынак дзяўчат стартуе на стадыёне ў парку Горкага ў 16.00, хлопцы выйдуць на поле ў 19.00. Праграму Кубка наймацнейшых спартсменаў па хакеі на траве заўтра адкрыюць матчы зборных Беларусі-U21 і Узбекістана (12.00 і 14.00).
