Помнік Маршалу Савецкага Саюза, двойчы Герою Савецкага Саюза, камандуючаму парадам Перамогі 24 чэрвеня 1945 года Канстанціну Ракасоўскаму адкрылі ў Гомелі ў 82-ю гадавіну вызвалення горада над Сожам ад нямецка-фашысцкіх захопнікаў, перадае БелТА.
З ініцыятывай стварэння помніка Канстанціну Ракасоўскаму жыхары абласнога цэнтра выступілі ў 2024 годзе. Адкрыты творчы конкурс быў праведзены Расійскім ваенна-гістарычным таварыствам. Пераможцам стала работа скульптара з Расіі Юліі Пашынай.
Помнік устанавілі ў абноўленым пасля рэканструкцыі скверы каля фабрыкі «8 Марта». Маршал Ракасоўскі адлюстраваны верхам на кані падчас парада Перамогі 1945 года на Краснай плошчы ў Маскве. Агульная вышыня бронзавага помніка з пастаментам — 6 м.
На ўрачыстай цырымоніі з нагоды адкрыцця помніка сабраліся кіраўніцтва вобласці і горада, парламентарыі, прадстаўнікі Адміністрацыі Прэзідэнта Расійскай Федэрацыі, афіцыйныя дэлегацыі рэгіёнаў Расіі, жыхары і госці Гомеля, а таксама ўнук Маршала Савецкага Саюза — Канстанцін Вільевіч Ракасоўскі.
Як падкрэсліў Старшыня Палаты прадстаўнікоў Нацыянальнага сходу Беларусі Ігар Сергяенка, Вялікая Перамога, 80-годдзе якой мы адзначаем сёлета, звязана непасрэдным чынам з іменем маршала Ракасоўскага.
