Чаму грамадскі транспарт у Мінску можа не прыйсці дакладна згодна з раскладам, растлумачыў генеральны дырэктар дзяржаўнага прадпрыемства «Мінсктранс» Канстанцін Галалобаў у эфіры тэлеканала АНТ. Пра гэта піша sb.by.
Канстанцін Галалобаў вылучыў тры асноўныя прычыны затрымкі транспарту:
— Першая і самая галоўная — гэта транспартныя заторы. Збоі ў большасці выпадкаў адбываюцца менавіта з гэтай прычыны. Слова «затор», можа, не зусім дастасавальнае да Мінска, разам з тым ніхто ж не застрахаваны ад дарожна-транспартных здарэнняў. Найменшы збой — і транспарт спыняецца. Адпаведна, потым атрымліваецца так, што аўтобусы збіраюцца разам, ідуць адзін за адным. Дыспетчар прымяняе метады рэгулявання: разводзіць па канцавых дыспетчарскіх станцыях, мяняе напрамак, дзесьці мы скарачаем рэйс, разварочваем транспарт на найбліжэйшым разваротным кальцы, каб зноў увайсці ў графік і трымацца раскладу.
Паводле слоў гендырэктара, таксама ўплываюць умовы надвор’я, асабліва зімой. Акрамя таго, варта ўлічваць, што да адмен і затрымак могуць прывесці паломкі транспарту або хвароба кіроўцы.
— Такія сітуацыі таксама не рэдкасць, і гэта таксама ўплывае на выкананне раскладу транспарту, — падкрэсліў Канстанцін Галалобаў.
Калі ж праблема сістэмная, пасажыры могуць звярнуцца на гарачую лінію «Мінсктранса», якая працуе кругласутачна. Таксама можна пакінуць электронны зварот праз партал «обращения.бел».
