Галіна актыўна пераходзіць да інтэлектуальных сетак — сістэмы аўтаматычнага рэгулявання і кантролю. Прынцып іх работы падобны да ​​канцэпцыі разумнага дома, але прымяняецца ў маштабах усёй энергасістэмы. «Мы ідзём па шляху аўтаматызацыі не толькі электрычных, але і цеплавых сетак. Павышэнне ўзроўню кантролю дае магчымасць рабіць сеткі больш эфектыўнымі як з пункту гледжання энергаспажывання, так і эканомікі. Дзякуючы мерам, што ўкараняюцца, нам удалося знізіць страты. Калі ў 2010-я гады гэты паказчык па краіне перавышаў 10%, то па факту 2026 года ён складае менш як 6%. Работа па далейшым зніжэнні страт у цеплавых сетках прадаўжаецца», — растлумачыў Міхаіл Шэвалдзін.

Каменціруючы ролю штучнага інтэлекту ў энергетыцы, галоўны інжынер «Белэнерга» падкрэсліў, што тэхналогіі машыннага навучання эфектыўныя для аналізу даных і прыняцця рашэнняў, аднак маюць абмежаванні ў пытаннях забеспячэння надзейнасці цеплазабеспячэння.

Штучнаму інтэлекту складана гарманізаваць эканамічную эфектыўнасць і сацыяльную адказнасць. Алгарытм, які аптымізуе затраты, можа прапанаваць пакінуць у рабоце мінімальную колькасць абсталявання, аднак у сацыяльна арыентаванай дзяржаве прыярытэтам з’яўляецца бесперабойнае забеспячэнне спажыўцоў цяплом, асабліва ў крытычных сітуацыях і пры нізкіх тэмпературах, растлумачыў Міхаіл Шэвалдзін.

Паводле яго слоў, ніхто не хоча апынуцца ў халоднай кватэры або ўстанове сацыяльнай сферы (школе, дзіцячым садзе, бальніцы) у маразы, таму заўсёды неабходна мець рэзерв магутнасці, нават калі гэта не заўсёды эканамічна аптымальна з пункту гледжання чыстых алгарытмаў.

Міхаіл Шэвалдзін дадаў, што працэсы мадэрнізацыі і аўтаматызацыі не абмяжоўваюцца сталіцай. «Аўтаматызацыя прыходзіць у кожны горад, у кожную вёску. Нашы рамонты і рэканструкцыя ахопліваюць усе раённыя цэнтры і населеныя пункты Беларусі», — рэзюмаваў першы намеснік гендырэктара.