«Савет Еўразійскай эканамічнай камісіі, разгледзеўшы ініцыятыўныя прапановы Расійскай Федэрацыі, прыняў рашэнні аб устанаўленні агульных правіл лічбавай маркіроўкі ў дачыненні да шэрага новых катэгорый тавараў. У прыватнасці, размова ідзе пра ікру асятровых і ласасёвых рыб, веласіпеды і веласіпедныя рамы, асобныя віды змазачнага масла, змазачныя матэрыялы і спецыяльныя аўтамабільныя вадкасці, касметычную прадукцыю з антымікробным дзеяннем, а таксама дэзынфіцыруючыя сродкі», — растлумачылі ў ЕЭК.

«Пашырэнне колькасці маркіруемых тавараў сведчыць аб развіцці агульнай сістэмы маркіроўкі саюза, якая дае магчымасць спажыўцам пераканацца, што прадукцыя не падробленая, а таксама павышае канкурэнтаздольнасць добрасумленных удзельнікаў рынку за кошт змяншэння незаконнага абароту», — адзначыў член Калегіі (міністр) па гандлі ЕЭК Андрэй Сляпнёў.

Ён падкрэсліў, што маркіроўка новых груп тавараў будзе праводзіцца, як і раней, па ўніфікаваных правілах. Пры гэтым улічваюцца палажэнні базавай тэхналагічнай арганізацыйнай мадэлі сістэмы маркіроўкі тавараў сродкамі ідэнтыфікацыі ў ЕАЭС, зацверджанай рашэннем Савета ЕЭК ад 5 сакавіка 2019 года нумар 19. Такім чынам, будзе забяспечвацца ўзаемнае прызнанне кодаў, што выключыць неабходнасць перамаркіроўкі тавараў пры іх абарачэнні на тэрыторыі саюза.

Пасяджэнне Савета ЕЭК праходзіць 8 ліпеня ў анлайн-фармаце. У 2025 годзе ў органах ЕАЭС старшынствуе Беларусь, Савет ЕЭК узначальвае віцэ-прэм’ер Наталля Пяткевіч.