Арганізатары падрыхтавалі насычаную праграму для ўсіх узростаў. Асаблівая ўвага — выхаванцам ваенна-патрыятычных клубаў: для іх гэта магчымасць пазнаёміцца са службай і вызначыцца з будучай прафесіяй. 

Адной з самых папулярных зон стала пляцоўка Дзяржаўтаінспекцыі. Тут для малышоў арганізавалі конкурс «Забег у паўзунках», а для старэйшых гледачоў — незвычайнае дэфіле ў мотаэкіпіроўцы з удзелам байкераў і выхаванцаў спартыўных моташкол. Не менш папулярныя экспазіцыі ўзбраення і спецыяльнай тэхнікі, спартыўны гарадок з паласой перашкод, вяровачная пераправа, а таксама пейнтбольны і страйкбольны ціры. А байцы спецпадраздзяленняў унутраных войскаў запрашаюць выхаванцаў ваенна-патрыятычных клубаў пазмагацца ў лазертаг, а таксама атрымаць майстар-клас у ціры і на татамі.

Навыкі і асаблівасці работы дэманструюць дарослым і дзецям кінолагі са сваімі чатырохногімі напарнікамі. Дарэчы, пагладзіць жывёл і зрабіць памятныя фота як з дарослымі сабакамі, так і з шчанюкамі можа любы ахвотны. Увагі заслугоўвае і пляцоўка музея МУС: рэдкія экспанаты і дакументальныя матэрыялы выклікаюць у наведвальнікаў такую ж цікавасць, як і выстава службовых рэтрааўтамабіляў.

Традыцыйна шматлюдна і на тэматычных пляцоўках навучальных устаноў — Акадэміі МУС, Магілёўскага інстытута, спецыялізаваных ліцэяў. Абітурыенты і іх бацькі могуць пагаварыць з курсантамі і ліцэістамі, задаць пытанні аб умовах паступлення, асаблівасцях навучальнага працэсу і кар’ерных перспектывах — магчымасць атрымаць гэту інфармацыю з першых вуснаў робіць пляцоўкі асабліва карыснымі для тых, хто сур’ёзна задумваецца аб службе ў органах унутраных спраў.

Аміна НАЗАРАВА

Фота з тэлеграм-канала МУС Беларусі