Традыцыйнае свята, прымеркаванае да Міжнароднага дня абароны дзяцей, пройдзе 31 мая і 1 чэрвеня ў Цэнтральным батанічным садзе Нацыянальнай акадэміі навук Беларусі. Аб гэтым паведамляе БелТА са спасылкай на прэс-службу ўстановы.
Святочная праграма «Падарым радасць дзецям» будзе працаваць з 10:00 да 19:00 і разлічана на сямейную аўдыторыю: малых ад 6 месяцаў, дашкольнікаў, школьнікаў і іх бацькоў.
Гасцей чакае насычаная забаўляльная праграма:
- анімацыйныя шоу;
- выступленні дзіцячых калектываў;
- навуковае шоу;
- шоу мыльных бурбалак;
- танцавальны флэшмоб;
- майстар-класы;
- забег паўзункоў;
- модныя паказы;
- зона прыгажосці;
- разнастайныя фотазоны, лекторыі, а таксама буккросінг і зона кнігалюбаў.
Таксама падчас свята пройдзе дабрачынная акцыя Усе жадаючыя змогуць перадаць кнігі, цацкі, школьныя прылады або сродкі гігіены, якія пасля будуць накіраваны ў дзіцячыя дамы.
Для дзяцей да 3 гадоў, удзельнікаў ВАВ, інвалідаў усіх груп, а таксама дзяцей са шматдзетных сем’яў (пры прад’яўленні пасведчання) уваход бясплатны.
