Міністэрству аховы здароўя перадайце, каб яны сур’ёзна прааналізавалі эпідэмсітуацыю ў Беларусі. Нам трэба прымаць дадатковыя меры да таго, што яны прынялі. Калі ласка — усё ў краіне закуплена тое, што не было выраблена, і лекі, каб зберагчы вас і вашых дзяцей ад хвароб.

Аляксандр Лукашенка падчас урачыстага пуску артэзіянскай вады з падземных крыніц для водазабеспячэння Мінска.

10 студзеня 2025 года.

Намеснік міністра аховы здароўя — галоўны дзяржаўны санітарны ўрач Святлана Нячай:

— З улікам меркаванага росту захворвання на вострыя рэспіраторныя інфекцыі ў канцы студзеня-пачатку лютага прапрацоўваецца комплекс дадатковых мерапрыемстваў па мінімізацыі рызык распаўсюджвання рэспіраторных інфекцый у арганізаваных калектывах і ў цэлым сярод насельніцтва.

Сярод прапанаваных і меркаваных мер асноўнае месца займае, безумоўна, бяспечная арганізацыя медыцынскай дапамогі ў установах аховы здароўя. У першую чаргу ў паліклініках вядзенне раздзельнага прыёму пацыентаў з саматычнымі захворваннямі і з прыкметамі вострых рэспіраторных інфекцый.

Улічваючы тое, што сярод усіх тых, хто звярнуўся з прыкметамі рэспіраторных інфекцый, 60 працэнтаў — дзеці, асаблівая ўвага ўдзяляецца арганізацыі супрацьэпідэмічных мерапрыемстваў і мінімізацыі рызык распаўсюджвання рэспіраторных інфекцый у дзіцячых калектывах, ва ўстановах адукацыі — школах, дзіцячых садках. Педагогі і медыцынскія работнікі вядуць работу па недапушчэнні ў арганізаваныя калектывы дзяцей з прыкметамі рэспіраторных інфекцый. Гэта так званыя ранішнія фільтры, якія падразумяваюць своечасовае выяўленне дзяцей з прыкметамі ВРІ.

Школьнікі з прыкметамі захворвання могуць адсутнічаць ва ўстановах адукацыі да пяці дзён без прадастаўлення медыцынскай даведкі. Такая мера ўведзена для таго, каб не ствараць залішняй нагрузкі для пацыентаў і арганізацый аховы здароўя, а таксама мінімізаваць рызыкі паўторнага інфіцыравання дзяцей пры наведванні паліклінік.

На прадпрыемствах і ў арганізацыях важнымі з’яўляюцца эфектыўнае функцыянаванне сістэм вентыляцыі, правядзенне вільготнай прыборкі, праветрывання, стварэння ўмоў для захавання асабістай гігіены.

Тым часам працягваецца вакцынацыя супраць грыпу, СОVІD-19. Імунітэт пасля прышчэпкі фарміруецца ў сярэднім два тыдні, таму яшчэ ёсць магчымасць зрабіць яе тым, хто не змог зрабіць гэта раней. Вакцына, якая выкарыстоўваецца супраць СОVІD-19, забяспечвае абарону да 12 месяцаў.

Улічваючы, што ў нас у запасе як мінімум два тыдні, а для фарміравання імунітэту гэтага часу дастаткова, прашу людзей з груп рызыкі скарыстацца гэтай магчымасцю і вакцыніравацца як ад грыпу, так і і ад каранавіруснай інфекцыі.

Разам з тым здароўе шмат у чым залежыць ад адказных адносін кожнага чалавека. У сезон высокай актыўнасці рэспіраторных вірусаў мэтазгодна выконваць правілы асабістай гігіены: старанна мыць рукі і імкнуцца не дакранацца да твару, мінімізаваць знаходжанне ў месцах масавага збору людзей. Пры кашлі, чханні важна выконваць рэспіраторны этыкет: выкарыстоўваць насоўку 
або чхаць/кашляць у выгін локця. Пры з'яўленні сімптомаў ВРІ, каб абараніць навакольных, варта выкарыстоўваць сродкі індывідуальнай абароны органаў дыхання.

Акрамя таго, важна актыўна займацца фізкультурай і спортам, больш знаходзіцца на адкрытым паветры, рацыянальна харчавацца, паўнацэнна высыпацца. Гэта ўсё, што мы з вамі маем, і ўсё тое, чым мы з вамі можам падмацаваць сваё здароўе, каб не дапусціць захворванняў.

Фота БелТА