Сярод мноства відэасюжэтаў, якія апублікаваныя ў папулярнай сацсетцы TіkTok, мы звярнулі ўвагу на той, дзе ўзнімаецца праблема адсутнасці дарогі на могілкі, што адносяцца да вёсак Слабуты і Сарочына Крычаўскага раёна Магілёўскай вобласці. На Радаўніцу, калі па традыцыі ўсе наведваюць месцы пахаванняў сваіх родных, замест дарогі на могілкі прыйшлося ўбачыць узаранае поле.
Як адзначае аўтар відэароліка, калі вяскоўцы звярнуліся з праблемай у сельвыканкам, ім паабяцалі, што гэта ненадоўга, што праз час там зробяць іншую, больш зручную дарогу. Аднак у выніку была прывезена куча жвіру з зямлёй, пяском і смеццем.
Людзі звяртаюцца з пытаннем да ўлады, як патрапіць на могілкі. «Дарога праз поле топкая. Ды і як усім ахвотным не ў паходным адзенні можна дабрацца туды? Да таго ж на гэтых могілках ёсць захаванні салдат, якія загінулі ў гады Вялікай Айчыннай вайны. Хто за імі павінен сачыць?» — такое пытанне было апублікавана ў TіkTok.
Каб дэталёва разабрацца, мы перш за ўсё звярнуліся да старшыні Маляціцкага сельвыканкама Уладзіміра РЫБЧЫНСКАГА:
— Дарога на могілкі вёсак Слабуты і Сарочына на самай справе існуе. Напэўна, для людзей, якія не змаглі дабрацца на Радаўніцу да месцаў пахавання, стаў праблематычным праезд туды па прычыне дрэннага надвор’я — у выніку моцных дажджоў дарогу размыла, — адказаў старшыня сельвыканкама. — Аднак гэта з’ява была часовай. Мы хутка адрэагавалі на зварот грамадзян — звярнуліся ў арганізацыю, якая непасрэдна займаецца рамонтам дарог, што праходзяць праз вёскі Маляціцкага сельсавета. Былі праведзены ўсе неабходныя работы, і цяпер праехаць да могілак не праблема.
Пра тое, якія канкрэтна работы былі праведзены, расказаў старшы майстар, які выконвае абавязкі галоўнага інжынера філіяла КУП «Магілёўаблдарбуд» ДРБУ № 198, Яўген БУРАЎКІН:
— Каб на могілкі, што адносяцца да вёсак Слабуты і Сарочына Маляціцкага сельсавета, можна было дабрацца без праблем, было праведзена прафіляванне дарогі, месцамі зрабілі нарэзку кюветаў і падсыпку. Аднак некаторыя грамадзяне не змаглі праехаць на вясковыя могілкі па прычыне таго, што пасля моцных дажджоў па дарозе праехаць цяжка — ад вялікай вагі сельскагаспадарчай тэхнікі ўтвараюцца каляіны. У цяперашні час руху аўтамабіляў па дарозе праз поле нічога не перашкаджае. І ўсё ж немагчыма гарантаваць, што стан дарогі не будзе пагоршаны па прычыне праезду буйнагабарытнай сельскагаспадарчай тэхнікі — ад вялікіх колаў зноў застануцца каляіны, паколькі дарога грунтавая. Цяпер на легкавым аўтамабілі да могілак можна праехаць без цяжкасцяў, — запэўніў адказны спецыяліст.
Святлана СІЛЬВАНОВІЧ
